Pe sa E Amataina ea se Afi i le Vaomatua?
O LE mea moni o le a e faapea mai e leai. Ae seʻi faatali lava! Atonu sa e faia. Faalogo foi i upu a le soʻo o Iakopo e faapea: “O le laulaufaiva, o le mea itiiti lea, a ua lafo upu faasili. Faauta, o le afi itiiti e mu ai le vao laau e tele!”—Iakopo 3:5.
O le laulaufaiva o se totoga tāua lea mo le tautala, ae pagā le faaaogaseseina! E faaaogā e tagata le laulaufaiva e pepelo ma taufaaleaga ai. Latou te tautatala faitio ai i isi, faaleagaina o latou talaaga lelei, ma taufaaʻoleʻole ai. O tagata faatupu vevesi, latou te faaaogāina le laulaufaiva e faatuputele ai le fouvalega. Sa faaaogāina e Adolf Hitler lona laulaufaiva e faapotopoto ai se atunuu mo le taua—o le mea moni o se ʻafi i le vaomatua!
E oo lava ia i latou e lelei o latou uiga, e mafai lava ona latou faamaiteina sina ʻafi itiiti i le vaomatua.’ Pe na e faia ea se tala ae mulimuli ane ua e faapea ana iloa lava e te lē tautala ai? Afai o lena le tulaga, ua e malamalama la i le uiga o le faamatalaga a Iakopo ina ua ia faapea mai: “E le mafai e se tasi tagata ona faalata i le laulaufaiva.”—Iakopo 3:8.
E ui i lea, e mafai ona tatou taumafai e faaaogā o tatou laulaufaiva mo mea lelei. E pei o le faisalamo, e mafai ona tatou mausali i le faapea atu: “Ou te faaeteete i oʻu ala, ina neʻi ou agasala i loʻu laulaufaiva.” (Salamo 39:1) Na i lo le soona faitio i isi, e mafai ona tatou taumafai e atiina aʻe i latou. Na i lo le faia o tala e faaleaga ai tagata, e mafai ona tatou talanoa i o latou uiga lelei. Na i lo le taufaasese ma faaʻoleʻole, e mafai ona tatou tautatala i le upu moni ma aʻoaʻo atu. Pe a uunaia i tatou e se loto lelei, o le a mafai e le laulaufaiva ona tautala atu i upu matagofie e malōlō ai. Na faaaogā e Iesu lona laulaufaiva i se auala ofoofogia e aʻoaʻo atu ai i tagata e uiga i le faaolataga.
O le mea moni, “o le oti ma le ola, o loo i le pule a le laulaufaiva.” (Faataoto 18:21) Po o avea ea lou laulaufaiva o se mea e fasioti ai pe faaolaina ai? Pe o ia amataina ea ‘se afi i le vaomatua’ po o ia tapeina? Na tatalo le faisalamo i le Atua e faapea: “E tautala loʻu laulaufaiva i lau afioga, auā ua tonu au poloaiga uma lava.” (Salamo 119:172) Afai tatou te atiina aʻe le uiga o le faisalamo, o le a mafai foi ona tatou faaaogā o tatou laulaufaiva mo le lelei.
[Ē Ana le Ata i le itulau 32]
U.S. Forest Service photo