“E Sili ona Faigata i le ʻOlo”

“I LE tulaga o loo iai nei, pe ā ma le 40 pasene o tamaiti o le Iunaite Setete o le a latou molimauina le mutaaga o faaipoipoga a o latou mātua a o leʻi atoa lo latou taʻi 18 tausaga.” (Science, Iuni 7, 1991) Pagā se fuainumera e faamataʻuina ai! Aisea ua tupu ai lenei mea?

Sa faaalia mai e se faamasino o mataupu tau aiga ma mavaega, o Edward M. Ginsburg, lona manatu i se faatalanoaga ma le Boston Globe. Sa ia faapea mai: “O i tatou o se sosaiete manatu faapito. Ua tatou mananao i ni mea mo na o ‘tatou.’ Ua tatou fesili e faapea, ‘O le ā sa tatou mea e maua ai nei?’ Ua tatou mananao e vave ona faamalieina.”

O lea manatu faapito lē taumatuaina, e oo atu ai i tiga ma fevaevaeaiga i faaipoipoga. Ua faapea mai Judge Ginsburg, pe a oo mulimuli ane ia ulugalii i le faamasinoga mo talagā faaipoipoga, ua tau fai mananao le tane ma le avā e tausaoina. Ua la mananao e faapea atu se isi o ia e saʻo, a o lana paaga e sese. La te mananao i se isi e faapea atu: “Ua e manumalo i le taua.”

Ua faamanatu mai ai e ana upu ia i tatou le faataoto faagaeeina e faapea: “O le tagata ua agaleagaina e lona uso, e sili o ia ona faigata i le ʻolo.” (Faataoto 18:19) Ioe, pe afai e mapuna aʻe se finauga i se faaipoipoga, atonu e lē finauaia ma ua maaa ē o finau. E masani lava ona mumusu e fia toilalo, e pei lava o se “ʻolo” malosi o loo osofaia.

Ae pe e tatau ona faapena? E leai, o loo iai se isi auala. E malolosi ma tumau faaipoipoga, pe afai e amata mai lava i le amataga o le faaipoipoga ona taufai usiusitai ia ē ua faaipoipo i upu a Pauro e faapea: “Ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.” (Efeso 4:32) Pe e faigofie ona atiae ia uiga? E lē faigofie i taimi uma. Ae o le ā le faigofie o le tatalaina o faaipoipoga? E faapeī le tiga o faigata tau faalogona ootia ma tau tupe o se faaipoipoga malepelepe? Ae e faapefea tamaiti, o ē e masani ona mafatia i tiga o tatalaga faaipoipoga a o latou mātua seia oo lava ina matutua?

E sili atu ona lelei mo le ulugalii ona galulue ia faatumauina se faaipoipoga, ma aua le faamaaa atu le tasi i le isi e pei o se “ʻolo” malosi. Ua faapitoa lava le faatatauina o le fautuaga a Pauro i Kerisiano, mo ulugalii faaipoipo: “O le alofa . . . o le fusi lea e atoatoa ona lelei ai.”—Kolose 3:14.

[Ē Ana le Ata i le itulau 32]

The Complete Encyclopedia of Illustration/J. G. Heck