O le Alu i le Lagi, po o le Alu i Seoli?

“O Ā NI ou avanoa e te alu ai i le lagi, po o le alu i seoli?”

O le manatu autū lena na fesili ai se vaega suesue o tagata Amerika i se suesuega talu ai. Na faasalalauina e le Ogatotonu o Suesuega Faalelotu i Princeton iuga i le tusi Religion in America 1992-1993.

Semanu o le ā lau tali i lena fesili? O ā ni avanoa o lau paaga ma isi o ē pele ia te oe e ō ai i le lagi pe a maliliu? Pe e te manatu o se mea talafeagai le faapea o oe, po o i latou, atonu o le a iu ina ō atu i seoli?

Na faaalia i le suesuega, e 78 pasene o tagata na manatu o lo latou avanoa e ō ai i le lagi e lelei pe e sili ona lelei, e sili ona toatele na i lo o le aofai o ē ua tali mai faapena pe ā ma le 40 tausaga ua mavae. I Seoli? E tusa ma le 77 pasene na faapea mai, e toaitiiti na manatu ailoga e ō atu i inā.

Po o a latou tali ea sa faavae i le poto saʻo mai le Tusi Paia? Ia, e tusa o le toʻa 4 mai le toʻa 10 na ioe mai e faapea, ua masani ona faaitiitia lo latou auai i ni sauniga lotu na i lo o le lima tausaga ua mavae. E na o le 28 pasene sa faapea mai e auai i vaega o suesuega faale-Tusi Paia, ma e 27 pasene i vasega o aʻoaʻoga faalelotu.

Afai e te suesue ma le faaeteete le Tusi Paia, o le a e maua ai nisi o mea moni e te teʻi ai. O se faaaoaoga, ua faasino saʻo mai i le Tusi Paia, ina ua maliu Iesu, sa alu o ia i “[hele] seoli,” e pei ona taʻu mai i nisi o fuaiupu o le Tusi Paia. (Galuega 2:31, King James Version; “Heitisi, [Hades]” New World Translation) Ua faamaonia foi e le Afioga a le Atua, e leʻi ō atu le tupu o Tavita po o Ioane le Papatiso i le lagi ina ua maliliu. (Mataio 11:11; Galuega 2:29) O mea moni na, e lē na o ni manatu a se suesuega faalotu.

O isi mea moni e te ono aafia ai: Ua aʻoaʻo mai i le Tusi Paia, o aposetolo o Iesu ma se fuainumera faatapulaaina o isi o le a aveina aʻe i le lagi e pule faatasi ma Iesu. Ae o le toatele o tagata o ē ua maliliu, ua na ona ō atu i le tuugamau taatele o tagata. O le a toe faatutuina mai i latou e le Atua, i le toe faaolaina mai o i latou i luga o le lalolagi faatasi ai ma le faamoemoe i le ola fiafia e lē uma i se parataiso toe faafoisia faalelalolagi.

O le a fiafia Molimau a Ieova e fesoasoani atu ia te oe ina ia faamautinoa mai i lau lava Tusi Paia le faavae maufaatuatuaina mo lena faamoemoe.