E Sili atu le Tautele na i lo o Amu
Ua faafiafiaina se aofaiga tele o tagata asiasi i ni faaaliga o mea e pei o lenei e maua i le Sami Ulaula.
O le lē mafaitaulia o iʻa felanulanuai, e matuā maofa ai i latou e faia le faagatama o le tofutofu i le sami. Ae ua matauina foi e faapea, e lē gata i iʻa felanulanuai o loo vaaia i inei, ae e iai foi se faaaliga e matuā mataina i le vaaia o mea ofoofogia i lalo o le sami, e aofia ai ma amu felanulanuai matagofie.
O amu matagofie, e maua i le tele o foliga ma lanu eseese. E pei ona e vaai faalemafaufau i ai, e oo lava i aso anamua, sa matuā taugata tele fasi amu matagofie. Mai i na amu, na gaosia ai e tagata tomai i le faia o mea taulima ni mea teuteu fale mananaia, ma sa taʻua foi e tusitala o le Tusi Paia amu faatasi ma auro, ma ario, ma maa mūmū. (Faataoto 3:14, 15; Esekielu 27:16) Ae ua fesoasoani mai na tusitala ia i tatou e vaai i tala atu o le isi matagofie ma le tāua o loo i tala atu o amu lava latou.
Ua latou faamatilatila mai e faapea, e iai nisi mea e sili atu ona tāua, ma e ao ona sili atu ona tatou faapelepele i ai. O se tasi o ia mea o se avā lelei, ma poto, auā ua tatou faitau ai: “O le avā amio lelei, o ai ea se ua maua? e silisili lona tau i penina [“amu,” NW].” (Faataoto 31:10) Po o oe o se tane ua faaipoipo? Seʻi toe vaai i amu matagofie i inei, ma ia manatunatu po o e faafaatauaina faapena lau avā e pei ona tatau ai.
Po o i tatou o ni tamaloloa po o ni fafine, faaipoipo pe nofo fua, o le tagai atu i amu matagofie, e ao ai ona tatou talisapaia le aogā e sili atu ona tāua o le atamai mai le Atua, le faautauta, ma le poto. Ua faapea mai le Afioga a le Atua: “Amuia le tagata na te maua le poto, ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lea i le auro. E sili ona lelei o ia i penina [“amu,” NW]; ma au mea faafiafia uma lava e le tusa ma ia.”—Faataoto 3:13-15; 8:11.
O lea, e tusa lava pe sa tatou vāai i ai e ala i le tofutofu pe ala i ni ata, e ao lava i amu o le Sami Ulaula ona aumaia ai ia i tatou le matagofie ma se mea e aogā ona toe mafaufau i ai.