Lipoti a Ē Faalauiloa le Malo
Na Ia Mulimuli i Lona Loto Fuatiaifo ua Aʻoaʻoina Mai le Tusi Paia
NA TATALO le tupu o Isaraelu o Tavita mo le fesoasoani a Ieova ina ua ia faapea atu: “A e peitai au nei, ou te savali ma laʻu amio sao; ia e laveai ia te au; ma ia e alofa mai ia te au.” (Salamo 26:11) Sa finagalo malie le Atua ia te ia mo lona tumau i lona faamaoni. Sa faamanuia foi Ieova ia Iesu ona o lona faia o le finagalo o lona Tamā faalelagi, ma sa Ia faamanuiaina foi se talavou i Kolomepia o lē sa mulimuli i lona loto fuatiaifo ua aʻoaʻoina mai le Tusi Paia ma ua maumauai e fai le finagalo o le Atua. Na taʻua e lenei talavou e faapea:
“Sa ou aʻoga i se aʻoga Katoliko ina ua amata ona ou suesueina le Tusi Paia ma Molimau a Ieova. Peitai ane, na faalavelavea aʻu e loʻu loto fuatiaifo pe a ou auai i Misasa, o lea sa ou alu atu ai i le pule o le aʻoga (sa o se patele), le faufautua, ma le taʻitaʻi o le matou vaega, ma faanoi i ai ina ia faataga loʻu lē auai i le Misasa. E ui lava ina sa mafai, ae sa taumafai nisi e faamalosia loʻu auai. Sa faateteleina omiga ina ua uma loʻu papatisoga o se Molimau a Ieova. Sa folafola e loʻu tamā le tuliina o aʻu mai le aiga pe afai e faatea aʻu mai le aʻoga. Sa faamoemoe o ia ia ou aʻoga i le univesite ma maua ai saʻu galuega lelei.
“Na faia soo e le pule ni lapataiga e faatatau i se tasi e lē taulau ona usiusitai i tuutuuga a le Katoliko. Ina ua faia le uluai Misasa o le tausaga, sa ou lafi seʻi uma. Ona ou aveina lea i le faiaoga (o se patele) se kopi o le polosiua Aʻoga ma Molimau a Ieova ma taʻu atu i ai e faapea, talu ai ona o aʻu o se tasi o Molimau a Ieova, e lē mafai ona ou auai i le Misasa. Sa ia faapea mai: ‘E sili pe a amata ona suʻe se isi au aʻoga.’ Ua ou iloaina o le faateaina o aʻu mai le aʻoga, o lona uiga foi, o le tuliesea lea o aʻu mai le matou aiga e loʻu tamā. E ui i lea, sa ou tatalo ia Ieova ma faaauau pea ona avatuina se molimau maeaea i aʻu uo aʻoga.
“Ua oo i le vaitaimi o tuuaga. Ma, ina ua toe taliu mai i aʻoga ina ua maeʻa le tuuaga, ua toe oo foi i le taimi o le Misasa. Sa tutū mai le pule ma isi patele i luma o le falesa laitiiti, ua nofo sauni e faalogologo i kofesio (taʻutinoga o agasala). Sa tau manumalo le fefe ia te aʻu. Sa ou savali atu loa i totonu ma nofo i lalo, ae sa faalavelave mai loʻu loto fuatiaifo ia te aʻu. Ina ua amata ona usuina pese, sa ou mafaufau faapea, ‘O le ā laʻu mea lea e fai i inei? O Ieova o loʻu Atua. E lē mafai ona avea aʻu ma tagata palaai ma tuulafoaiina o ia. E lē mafai ona ou faia se mea e lē fiafia ai o ia. O le a na lē tuulafoaiina aʻu.’ Sa ou tatalo mo le lototele. Ona ou alu loa lea i fafo ma le falesa laitiiti ma tu i le laina o ē ō atu e kofesio. Ina ua ou oo atu i le pule, sa ou fai atu ia te ia: ‘Lau susuga a le faiaoga, ou te leʻi oo mai e taʻu atu ni aʻu agasala.’ Sa ia faapea mai: ‘E saʻo lava loʻu manatu.’ Sa ou taʻu atu i ai e faapea, ua ou malie po o le ā e oo ia te aʻu, ae ua lē faatagaina aʻu e loʻu loto fuatiaifo e auai i le Misasa. E lē mafai ona ou tetee i mea ua ou aʻoaʻoina mai i le Tusi Paia.
“Sa ia pulatoa mai ia te aʻu, ʻataʻata, ma faapea mai ‘Ou te fiafia ia te oe. O outou uma lava o Molimau a Ieova, e tatau ona avatu i ai le faamālō. Ia te outou, e muamua le Atua, ma ua tou nofo sauni e usiusitai i ana tulafono e tusa lava po o le ā le mea e tupu. Ia tumau ai. Ua e lelei tele. Maimau pe ana faapena uma tagata Katoliko e pei o oe i le faaalia o lena maelega ma lena alofa mo le Atua. E amata atu nei ona faataga oe e lē auai i a matou sauniga faalotu.’ Maeu le olioli na oo ia te aʻu! Ua faamanuiaina e Ieova loʻu maumauai e usiusitai i loʻu loto fuatiaifo ua aʻoaʻoina mai le Tusi Paia.
“I le aso na sosoo ai, sa faapea atu le pule i le au aooga: ‘Ua sili atu isi lotu ia te i tatou. Aisea ua tatou lē pei ai o i latou, e maelega, faatasi ma se alofa loloto mo le Atua ma se faanaunauga ia auauna ia te ia e sili aʻe i mea uma? O se mea lenei e tatau ona i o tatou loto.’
“Mulimuli ane na siitia le pule i Roma, ma sa lē amanaiaina loʻu lē auai e le pule fou. Na alu ese loʻu tamā mai le aiga ma ua ou saoloto ai e faataunuuina loʻu sini i le faiva faataimiatoa ina ua uma loʻu faauuga.”
Sa faamanuiaina e Ieova lenei tagata talavou o lē na mulimuli i lona loto fuatiaifo ua aʻoaʻoina mai le Tusi Paia. O le a faapea foi ona Ia faamanuiaina i latou uma o ē saili e faia lona finagalo.—Faataoto 3:5, 6.