Pe Tāua ia te Oe le Tusi Paia?

E SILI atu i le 200 tausaga ua mavae, na fanau ai Maria Jones i Llanfihangel, o se nuu maotua i Uelese e lē mamao mai le laina tuaoi o le Atalani. O ona mātua, sa o ni ē e faigaluega lalaga ma sa matuā matitiva tele—e oo lava i se Tusi Paia sa lē maua se tupe e faatau ai. Ae na la totōina i le loto o le la tama teine le alofa mo le Atua e ala i le faamatalaina atu ia te ia o ni tala mai le Tusi Paia, ma toe taʻua ni mau sa la manatuaina. Sa masani ona faitau e Maria le Tusi Paia i le gagana Uelese a se tuaoi, ma na amata ai ona ia faasaoina sina tupe itiiti na ia mafaia, ona o le naunau e faatau ai sana lava Tusi Paia.

I le tausaga e 1800, ina ua 16 tausaga o Maria, sa ia faalogo ai e faapea, ua iai ni nai Tusi Paia i le gagana Uelese o loo fia faatau atu, e 25 maila le mamao [40 kilomitaa] i se taulaga laitiiti i Bala. Ma le lē faavaivai, na ia faia ai se faaiuga maumauai e faapea, o le a savali i ai. Ma o le mea lena na ia faia, sa savali e leai ni seevae i le isi itu o le atumauga. Ae peitai, e taunuu atu, ua leai ni Tusi Paia, ua uma ona faatau atu. Ma sa iloa ai foi e Maria e faapea, e matuā laitiiti lava le tupe atoa na ia faasaoina.

Sa faagaeetia le faifeau o le nuu ona o le poto o Maria ma lona naunau fiafia i le Tusi Paia. I le vaai atu ua maligi ona loimata i le faanoanoa ona o nei taumafaiga uma na ia faia, sa ia foaiina atu i ai ma le agalelei lana lava kopi o le Tusi Paia, ma faapea atu: “Ia e faitau i ai ma le faaeteete, suesue i ai ma le filiga, ma ia teu i lou loto upu paia, ma ia e ola ai e tusa ma ona aʻoaʻoga.”

O lenei tala sa faamatalaina mulimuli ane i se fonotaga a le Komiti o le Sosaiete o Tamai Tusi Faalelotu i Lonetona. O i inā na faia ai le faaiuga ina ia avatu ni faaliliuga o le Tusi Paia e lē gata i tagata o Uelese, ae i le lalolagi atoa. Mai i lenei amataga faigofie, na tupu mai ai le uluai Sosaiete o le tele o sosaiete faale-Tusi Paia o lona 19 o senituri. Mulimuli ane, na amata ona vave faateleina le aliai mai o kopi o le Tusi Paia i gagana eseese.

I aso nei, ua lomia ai e le Watch Tower Bible and Tract Society, lea na lesitalaina i le 1884, Tusi Paia ma lomiga e fesoasoani i le suesueina o le Tusi Paia i gagana e sili atu i le 200. Ua na faasalalau atu ai i le lalolagi aoao kopi e 72 miliona, o le New World Translation of the Holy Scriptures ua faaliliuina i gagana faaonaponei. Na faaliliuina mai i uluai Tusi Paia Eperu ma Eleni, ua maua ai nei le New World Translation i se tusi atoa po o ni vaega i gagana e 18, ma ua faaliliuina nei i isi gagana faaopoopo e 12.

Ona o lea ua toetoe lava maua e tagata uma le Tusi Paia i aso nei, o le ā sou manatu i ai? E te faafaatauaina ea le Tusi Paia? Po o iai sau lava kopi e te faapelepele ma e faitau lava oe i ai?

[Ē Ana le Ata i le itulau 3]

From the book The Story of Mary Jones and Her Bible