“Ua Latou Iloa Lona Leo”

“O IEOVA, o loʻu leoleo mamoe o ia.” O upu amata nei o le Salamo 23. Ua toe faatusa foi e le Tusi Paia Ieova le Atua i se leoleo mamoe i le valoaga a Isaia, lea e faapea mai: “Na te leoleoina lona lafu e pei o le leoleo mamoe; na te sapaia tamai mamoe i ona lima, ma tauave i latou i lona fatafata; na te taʻitaʻi filemu i mamoe ua fananau.”—Isaia 40:11.

Ua faapena foi ona faatusaina Iesu Keriso i se leoleo mamoe. Na fetalai o ia: “O aʻu le leoleo mamoe lelei; e tuu atu e le leoleo mamoe lelei o lona ola e sui aʻi mamoe.” (Ioane 10:11) Na fetalai Iesu e faapea, “e faalogo foi mamoe i lona [le leoleo mamoe] leo; e valaau e ia ana lava mamoe i o latou igoa; na te taʻitaʻi atu foi ia te i latou.” Na ia faaopoopo mai “ona mulimuli atu ai lea o mamoe ia te ia [le leoleo mamoe], auā ua latou iloa lona leo. A e le mulimuli atu i latou i se tagata ese, a e sosola ese ia te ia; auā latou te le iloa le leo o tagata ese.”—Ioane 10:2-5.

Sa tausisia pea e Ieova le Atua ma lona Alo o Iesu Keriso, lea tulaga e pei ona faaatagia mai i le mau o loo talanoaina. La te tausia a laua mamoe faafaatusa i le agamalu ma le alofa. O le iuga, ua lagona ai e ē pei ni mamoe ua alofagia i latou , saogalemu, ma ua malu puipuia.

Ua talafeagai ai ona faatusaina o lenei faiā i le faiā a mamoe faaletino ma lo latou leoleo. I tuā i le 1831, na tusia ai e John Hartley e uiga i le mea na ia matauina e tusa ai ma lenei mea. Sa ia matauina e faapea, i Eleni, sa avea o se tu masani mo leoleo mamoe ona faaigoa a latou mamoe. Pe a valaau la le igoa, ona tali mai lea o le mamoe i le leo o le leoleo mamoe. Pe ā ma le 51 tausaga mulimuli ane, i le 1882, na matauina ai foi e J. L. Porter lea lava masani. Sa ia vaaitino i leoleo mamoe “o valaau atu . . . i se leo iī uigaese” lea na faalogo i ai mamoe, ma latou mulimuli atu ma le usiusitai i leoleo mamoe. I lena lava tausaga, na tusia ai foi e William M. Thomson e uiga i ni suesuega sa faia soo e faamautinoa ai e faapea, e mafai ona aʻoaʻoina mamoe e mulimuli i lo latou leoleo ma iloa lona leo.

Pe ua matauina ea i se taimi lata mai nei lenei faiā tutasi i le va o leoleo mamoe ma a latou mamoe? Ioe. Ia Setema 1993, i le lomiga o le National Geographic, na tusia ai e se tamaitai suesue i Ausetalia o Robyn Davidson le faamatalaga lenei e uiga i le tausiga o lafu manu a tagata Rabari i Initia i matū i sisifo e faapea: “O leoleo mamoe taitoatasi, e iai leo e fai lava sina eseese e valaau ai mamoe. E iai leo e valaau ai i le taeao ina ia ō ese atu, e iai foi se leo e valaau ai mamoe e faafeinu, ma faapena ai lava. E iloa e tagata taitoatasi ana lava mamoe, e iloa foi o ia e mamoe, ma o lana lafu patino, o le a vavae ese mai i latou mai le lafu tele ma mulimuli atu ia te ia i le taeao.”

E mautinoa sa matauina e Iesu le mea lea na faamatalaina e tagata faimalaga e toʻafā lea na seʻi faatoʻā taʻua. O mea na ia matauina na faaopoopo atu ai le moni i lana tala faatusa e uiga i le iloa e mamoe o lona leo. Po o oe o se tasi o mamoe a Iesu? Pe e te iloa lona leo ma faalogo i ai? Afai e te iloa ma faailoa atu ana aʻoaʻoga o le upu moni, ma afai e te usiusitai i ana poloaiga ma mulimuli i lana taitaiga i le tapuai atu ia Ieova, ona mafai lea ona e tofo i le leoleoga alofa ma le agamalu a Ieova le Atua ma lona Alo, o Iesu Keriso.—Ioane 15:10.