Aisea ua Manuia ai Pea Tagata Amio Leaga?
“SE A le mea ua ola mai ai o e amio leaga?” O lenei fesili na fesili ai Iopu faamaoni i aso ua mavae, ma o loo fesiligia pea i le tele o taimi talu mai ona aso. Ua faapena foi ona iai i mafaufau o le toatele o tagata i le nuu lea na taʻua muamua o Yugoslavia (e pei o le fafine lena o loo faaali mai i le faavaa), o ē na faanoanoa ona o tagata na mafatia i se taua matautia. Aisea ua faasaoina ai tagata amio leaga ma ua oo lava ina manuia? E pei ona matauina e Iopu, e masani lava ona “saogalemu o latou fale e leai se mea e matatau ai, ua le i ai foi i o latou luga le sasa a le Atua.”—Iopu 21:7, 9.
Po o le uiga ea la ua le o toe aogā ona auauna i le Atua, alofa atu i tuaoi, ma aloese mai le faia o mea sese? E mautinoa lava e leai! Ua taʻu mai e le Tusi Paia i a i tatou le manatu saʻo ina ua faapea mai: “Aua e te taumafai e faasili aʻe oe i ē amio leaga, po o lou taumafai ia lua tutusa ma ē fai mea leaga. Auā e lē pine ona seleeseina i latou e pei o le mutia; e mamae atu e pei o le vao lauolaola. Ia faatuatuaga i le ALII, ma faia amioga lelei.”—Salamo 37:1-3, The New English Bible.
Ioe, o le olaga manuia o loo maua nei e ē fai amio leaga e puupuu. O le mea moni, e matuā puupuu ō latou ola, ae ua iai i ē o loo auauna i le Atua se faamoemoe matagofie mo le lumanai. Ua toeitiiti, ona faataunuuina loa lea o le folafolaga a le Atua: “E soloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga, auā ua mavae atu mea muamua.” (Faaaliga 21: 4) Ua na o ē amiotonu lava, o le a vaai i lena taimi, ae lē o ē amio leaga. Maeu se faalaeiauga o le faalatalata atu i le Atua ma ia tatou aʻoaʻoina pe faapefea ona faia lona finagalo, e ui i amioga leaga a i latou o loo siomia i tatou!
Afai e te fia iloa nisi faamatalaga atili pe manao foi e asiasi atu se tasi e faia se suesuega faale-Tusi Paia ma oe i lou aiga e aunoa ma se totogi, faamolemole tusi atu i le I.B.S.A., Box 673, Apia, Western Samoa, po o se tuatusi talafeagai o loo lisiina mai i le itulau e 2.