Lipoti a Ē Faalauiloa le Malo

E Ofo atu ma le Loto e Tagata o le Atua i Latou Lava

O LONA igoa o Iosefa, ma na fanau o ia i le motu o Kuperu. Sa iai o ia i Kerisiano o le uluai senituri ia na faatauina atu ō latou fanua ma fale ina ia fai ai so latou sao i le faatupeina o le faaauilumaina o le Faa-Kerisiano. Ona o lona loto alofa ma le limafoai, na faaigoa ai o ia o Panapa; o lona uiga “O le tagata faamafanafana.”—Galuega 4:34-37.

O lea naunau moni atu i isi, ua avea pea ma faailoga e iloa ai tagata tapuai moni o Ieova. Ua leai se eseesega ma Molimau a Ieova o aso nei, e pei ona faamatilatilaina mai le tala o sosoo mai o le mea na tupu i le Atu Solomona.

Na faimalaga ane se vaega e sili atu i le 60 o Molimau mai Ausetalia ma Niu Sila i Honiara, le laumua o le Atu Solomona o loo i Guadalcanal. Na latou ō atu e fesoasoani i le fausiaina o se Maota Fono mo faatasitasiga tetele faa-Kerisiano. E na o le lua vaiaso na latou faaaluina e faatū ai le maota e mafai ona ofi ai le 1,200 tagata!

I le taimi lava lea, na faaavanoa atu ai e taʻitaʻi o le taulaga laitiiti o Munda e i le motu o New Georgia, se fasi fanua e tu i le ogatotonu o le taulaga i le faapotopotoga o Molimau a Ieova i inā. Sa latou mananao e fai se Maota o le Malo, le nofoaga o tapuaiga. Ma sa latou matuā manaomia sea nofoaga. Sa masani ona latou potopoto i le potu mālōlō o se tamai fale atolau, ma sa leai ni ā latou mea e maua e fai ai se Maota o le Malo.a E toatele i tagata matutua, ma ē vaivai ma tamaiti le faapotopotoga, ma sa leai ma se tasi e iai se poto masani i le faiva o le faufale.

E tusa ma le 235 maila [po o le 380 kilomita] le mamao, i le motu o Guadalcanal, na ofoina mai ai ma le loto e Molimau i inā i le aai o Honiara i latou lava e fesoasoani. (Salamo 110:3) Na latou manatu faapea: “Afai na loto malilie ō matou uso i isi atunuu e fai le Maota Fono mo matou i le lua vaiaso, e mafai foi la ona matou fesoasoani i ō matou uso i Munda e fai so latou Maota o le Malo i le lua vaiaso.”

O le mea lena na tupu. I le tasi aso, na taunuu ai i Munda le vaa e tumu i Molimau tauofo loto naunau ma le fiafia. Na matuā pisi tane ma fafine, o ē matutua ma talavou, i le laʻueseina o la latou uta ma sauniuni mo le amataina ona fau o le fale i laupapa, simā, apa atofale, ma isi meafaufale na muai taunuu i Munda a o latou leʻi taunuu atu.

E leʻi leva lava ona amata le galuega, ae emo malosi mai se uila ma pa se faititili ma motusia ai le toe mauaina o le suavai o le taulaga. E ui i lea, sa leʻi avea lea o se faafitauli tele. Na eliina e Molimau se vaieli lea na maua ai vai a o faagasolo le fausiaina o le fale atoa. Ae faapefea meaai mo le aufaigaluega atoa? Sa lē o se faafitauli foi lena mea. O tagata tauofo mai Honiara, na ō mai ma le tele o meaai na saunia mai e ā latou faapotopotoga i Honiara. Na latou ō mai foi ma la latou ʻau kuka!

Na maimoaina ma le ofo tele e tuaoi le solosolo lelei o le galuega. Na faapea mai se tasi o i latou: “E lē mafai ona mafaia ni mea tetele faapea i ni nai aso i inei. E faaaluina ai ni tausaga.” O se tasi o tuaoi o se taʻitaʻi lotu, na ia taʻutino mai e faapea, e 20 tausaga ua teʻa o fai e lana aulotu se fale ae e leʻi uma lava. I se eseesega, o le Maota o le Malo fou o Molimau a Ieova i Munda na fai lava ma uma i le na o le sefulu aso!

[Faaopoopoga i lalo]

[Ata i le itulau 24]

Vasa Pasefika i Saute

ATU SOLOMONA

Munda

GUADALCANAL

Honiara

[Faafanua]

AUSETALIA

NIU SILA