Molimau a Ieova i le Lalolagi Aoao—Zambia

I LE totonugalemu o Aferika i saute tutotonu, o loo iai le atunuu—o le atunuu lenei o Zambia—i ōna laufanua lautele fetavioai i luga o se mauga mafolafola telē e 4,000 futu [1,200 mita] le maualuga. I mātū i sasaʻe, o loo iai le Atu Mauga o Muchinga ua oo lona maualuga i le 7,000 futu [2,100 mita]. O le vaitafe telē ma le malosi o Zambezi e mataina ona tafega paʻo leotetele o loo tafe atu agaʻi i le afu lauiloa o le Victoria Falls, ua faia aʻe ai le tele o le tuaoi i saute o lenei atunuu. E matuā eseese tagata e iai, faatasi ma le sili atu i le 70 ituaiga eseese. E valu lava gagana taatele o loo tautatala ai nei tagata, ae e tele isi gagana o loo iai.

I le tausaga e 1911, na amata ai ona iai ma salalau atu se isi gagana ese i Zambia. Na faaoo atu e tagata asiasi i totonu o le atunuu ia kopi o le Studies in the Scriptures, ma amata mai ai i inā e Molimau a Ieova ona taumafai malosi e faasalalauina atu le “gagana mamā” o upu moni o le Tusi Paia i totonu o Zambia. (Sefanaia 3:9, NW) O talitonuga e sili ona luitau tele o talitonuga e lē faale-Tusi Paia e uiga i le tulaga o ē ua maliliu. Ina ua aʻoaʻoina e tagata le upu moni ma iloa ai le faapologaina o i latou e talitonuga faatemoni, na avea ma saolotoga aafiaga na maua mai ai!—Ioane 8:32.

Mo se faaaoaoga, na lipotia mai e se tasi tuafafine faamaoni e faapea: “Ina ua maliu faafuasei le tuagane laitiiti o loʻu tina, na fememeai ai loʻu tina, o se sui iloga o le Lotu Tuufaatasi a Zambia. Ina ua uma la sauniga o le tanuga e vaiaso le umi, sa ou toe foi i le nuu e vaai po o faapefea mai o ia. I loʻu taunuu atu, na ou maua atu ai se tamaloa faamatuā tagata i le fale, ma ina ua alu, sa ou fesili atu loa i le tina o loʻu tina po o ai o ia. Na ia fai mai, o ia o se fomai faataulaitu. Sa fuafuaina e loʻu tina e totogi o ia ina ia tauia le oti o lona tuagane ina ia mafai ai e le agaga o lona tuagane ona mālōlō. Na talitonu o ia faapea, o loo ‘fealuai solo’ lea agaga, e pei ona ia faaupuina ai.

“Na faamatala atili mai e le tina o loʻu tina e faapea o se faamanuiaga loʻu asiasi atu auā o lea e tau saili e le aiga se tupe e totogi ai le faivai faataulaitu. Na ia talosaga mai e fai atu saʻu foai, ae sa ou faamatala manino i ai e faapea, i le avea o se Kerisiano, e lē mafai ai ona fai saʻu vaega. Na ou talanoa i a te ia i le Salamo 146:4, lea e faaalia mai ai faapea o ē ua feoti ua lē o toe manatunatu—o lea e leai se agaga o ‘fealuai solo.’ Na ma iloiloina foi le Roma 12:19, lea e faasino mai ai faapea o le taui ma sui e ā Ieova lea, ae lē o tatou. Ina ua uma lena, sa ou talanoa loa i loʻu tina e uiga i le faamoemoe o le toetu na fetalai i ai Iesu, e pei ona faamauina i le Ioane 5:28, 29. Na faagaeetia o ia i loʻu faatuatua malosi i folafolaga a le Atua. E lei leva mulimuli ane ae suesue o ia ma se tuafafine Molimau, ma agaigai vave i luma. Na ia taofia āna sootaga uma ma lana lotu muamua, ae faailogaina lona tuuina atu i le Atua i le papatisoga. Ua avea nei o ia ma se tasi o Molimau a Ieova.”

Ua lipoti mai e se isi tuafafine e faapea: “Sa ou alu i le tanuga o le toalua o le tuagane laitiiti o loʻu tina. I loʻu taunuu atu, na ou maua atu ai le tuagane o loʻu tina ma si oʻu tei ua matuā fia aʻai lava. E leʻi aʻai talu mai le aso na maliu ai le toalua lea o le tuagane o loʻu tina. Ina ua ou fesili atu pe aisea, na la tali mai ona e tusa ai i le aganuu, e lē faatagaina i laua ona tutu se afi e kuka ai ni meaai. Na ou ofo atu loa ou te kuka, ae na fefefe nisi sui o le aiga fai mai afai ae ou solia lenei aganuu faapaupau, e leaga ai nei ulu o tagata uma!

“Na ou faamanino atu i ai e faapea, i le avea ma se tasi o Molimau a Ieova, ou te faaaloalo ai i le mea o fai mai ai le Tusi Paia i le Levitiko 18:30, ma ou te lē mulimuli i aganuu e lē faale-Tusi Paia. Ona ou faaalia lea i a i latou le polosiua, Agaga o Ē ua Maliliu. O lena mea, na fai ifo ai fefaloaiga sa iai, ma ou alu ai loa lava aʻu ia sauni le meaai mo le tuagane o loʻu tina ma isi tagata uma na iai. Na pāiʻa loto o tauaiga o lē na maliu i loʻu lototele, ma loto malilie ai e suesue atili le Tusi Paia. Ua avea i latou o ni tagata talaʻi e leʻi papatisoina, ma o loo faamoemoe le aiga atoa e papatiso i se taimi lata mai.”

Maeu le faafiafiaina ai o i tatou i le mafai e le gagana mamā o le upu moni ona foia le fenuminumiai o aʻoaʻoga sese a lotu, ae maise talitonuga na ua matuā mauaa ma faapologaina ai tagata loto mamā! E ala i le fesoasoani a Ieova, ua salalau atu ai le gagana mamā i totonu o Zambia, e pei ona salalau atu i le lalolagi aoao.—2 Korinito 10:4.

[Pusa i le itulau 9]

FAAMAUMAUGA O LE GALUEGA I LE ATUNUU

Tausaga Faaleauaunaga 1994

TUMUTUMUGA O Ē O MOLIMAU ATU: 82,926

FAATATAUGA: 1 le Molimau i le 107 tagata

Ē NA AUAI I LE FAAMANATUGA: 363,372

FAATATAUGA O PAEONIA: 10,713

FAATATAUGA O SUESUEGA FAALE-TUSI PAIA: 108,948

AOFAI O Ē NA PAPATISO: 3,552

AOFAIGA O FAAPOTOPOTOGA: 2,027

OFISA O LE LĀLĀ: LUSAKA

[Ata i le itulau 9]

Vaega o le lālā o le Olo Matamata i le faatausiusiuga o Lusaka

[Ata i le itulau 9]

Talaʻiga i Shimabala, i saute o Lusaka