Tupe Siliva o loo I ai le Suafa o le Atua

SEʻI matuā tagaʻi lelei i tupe siliva o loo faaali mai i inei. Na faia e le tupu Siamani o Wilhelm V i le taimi o lana pulega mai le 1627 i le 1637. O le taimi lena a o feagai Europa tutotonu ma fevesiaiga o taua o le Tolusefulu Tausaga, i le va o tagata Katoliko ma Porotesano. Na ʻau Wilhelm V i le itu a tagata Porotesano. Ina ia faafetaiaia le tupe tele na manaomia mo le taua, na ia faaaogā uma ai ana siliva na i ai ma faia ai tupe siliva.

O le mea mataʻina la, o le tele o nei tupe siliva, o loo i ai le ata o le la o loo sioina le suafa o le Atua o Ieova o loo tusiaina i mataitusi e fa faa-Eperu. O loo i ai foi se niu, e faaalia ai le malosi. O lona faamatalaina e faapea e ui e loʻu le niu i le matagi, a e o loo puipuia lelei e le Atua, ma e lē gau ai lava lea niu. O le faaupuga faa-Latina o loo i le tupe o loo i ai le suafa o Ieova ma le faamatalaina mai o le faamautinoaina o lana puipuiga.

Nai lo le faamautinoaina la o le puipuiga a le Atua, o lea ituaiga o faaaogaina o le suafa o le Atua na matuā le aogā lava auā e le faaituau Ieova i ni fetauaiga sauā faaletagata. O le mea moni, sa lei finagalo malie le Atua i taua o le Tolusefulu Tausaga. “E tusa ai ma se faatusatusaga o mea na faasaoina,” fai mai le Funk & Wagnalls New Encyclopedia, “e sili atu i le afa o tagata Siamani na fasiotia i le taimi o le taua. Na matuā faaleagaina le tele o aai, o taulaga, o nuu, ma faatoaga o Siamani. Pe tusa e lua o vae tolu o falegaosimea, o mea tau faatoaga, ma mea faapisinisi a Siamani na faaleagaina.”

O le faaaogaina o le suafa o Ieova i nei tupe ua manatuaina ai le tulafono na tuu atu ia Isaraelu e faapea: “Aua e te taʻu fua le suafa o Ieova lou Atua.” (Esoto 20:7) E ui i lea, ua molimauina e nei tupe siliva faapea o le suafa o le Atua, o Ieova, ua leva ona masani ai tagata o Siamani. O le a le loloto o lou iloa o le Atua e ona lena suafa?