Fesili Mai le Au Faitau

Pe sa faailoga tagata le Atua i le filifilia o tane mai le ituaiga ma le atunuu e tasi —o tagata Iutaia uma—mo le vaega pule?

E leai, e mautinoa sa ia lei faapena. O i latou uma na muamua valaauina e Iesu e avea ma ona soo o tagata Iutaia. Mulimuli ane i le Penetekoso 33 T.A., o tagata Iutaia ma tagata liu lotu Iutaia sa avea ma ē na muamua faauuina i le agaga paia ma agavaa ai e pule ma Keriso i le lagi. I se taimi mulimuli ane, ona aofia ai lea o tagata Samaria ma tagata liliu lē peritomeina o Nuuese. O lea, e matuā malamalama lava o le vaega pule i lena vaitaimi sa o tagata Iutaia uma, “le au aposetolo ma toeaina i Ierusalema,” e pei ona taʻua i le Galuega 15:2. O tane ia na i ai so latou malamalamaga loloto o le poto faale-Tusi Paia ma ua tele tausaga o lo latou poto masani i le tapuaiga moni, ma na sili atu ona tele taimi na latou atiina aʻe ai i latou i le avea ma toeaina Kerisiano taumatuaina.—Faatusatusa i le Roma 3:1, 2.

E fai le fonotaga a le vaega pule lea e taʻua i le Galuega mataupu e 15, a ua toatele tagata Nuuese ua avea ma Kerisiano i lena taimi. E aofia ai tagata Aferika, tagata Europa, ma tagata mai isi vaipanoa. A e leai se faamaumauga o taʻu mai ai na faaopoopoina atu se tasi o na tagata o Nuuese i le vaega pule ina ia tataʻi atu ai i le Faa-Kerisiano ē e le ni Iutaia. A o maua e nei Kerisiano faatoa liliu o Nuuese le tulaga tutusa o ni sui i “le Isaraelu o le Atua,” latou te faaaloalogiaina le tulaga taumatuaina ma le lava o le poto masani o Kerisiano Iutaia, e pei o aposetolo, o ē na avea ma nisi o le vaega pule i tuā i inā. (Kalatia 6:16) Mātau i le Galuega 1:21, 22 le auala na matuā amanaia ai lea poto masani.—Eperu 2:3; 2 Peteru 1:18; 1 Ioane 1:1-3.

E tele senituri na feagai ai le Atua i se auala faapitoa ma le nuu o Isaraelu, lea na filifilia mai ai e Iesu ona aposetolo. Sa leai la se sese po o se le faamasinotonu i le faapea e leai se aposetolo na sau mai le nuu ua avea nei ma Amerika i Saute po o Aferika po o Sasaʻe Mamao. E oo mai lava le taimi e maua ai e tane ma fafine mai na nofoaga se avanoa e maua ai faaeaga e sili atu nai lo le avea ma se aposetolo i luga o le lalolagi, i le avea o se sui o le vaega pule o le uluai senituri, po o le mauaina o so o se isi tofiga i tagata o le Atua i aso nei.—Kalatia 3:27-29.

Na faaosofia se tasi aposetolo e taʻu mai e faapea “e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.” (Galuega 10:34, 35) Ioe, o aogā o le togiola a Keriso e avanoa i tagata uma, e aunoa ma se faailoga tagata. Ma o tagata taitoatasi uma mai ituaiga uma ma gagana ma nuu o le a aofia ai i le Malo faalelagi ma le motu o tagata e toatele lea o le a ola e faavavau i luga o le lalolagi.

E toatele tagata e ilitata ona o ituaiga tagata lanu eseese, o gagana po o talaaga faaleatunuu. Ua iloa lenei mea pe a faitau i le Galuega 6:1, i se finauga na māfua ai muimuiga i le va o Kerisiano na tautatala i le faa-Eleni ma ē na tautatala i le faa-Eperu. Atonu tatou te tutupu aʻe pe ia i tatou foi lea uiga ilitata faatatau i gagana, i atunuu, i talaaga faaleaganuu, po o i ituaiga tagata. E faatatau i lena mea moni lava o loo tupu, e lelei ai ona faia ni a tatou taumafaiga maumauai e aumaia ai o tatou faalogona ma auala o tatou gaoioi ai ia pei o le vaaiga a le Atua, lea e tutusa uma tagata ia te ia, e tusa po o le ā lo tatou tulaga faaletino. Ina ua faagaoioia e le Atua le faamaumauina o agavaa mo toeaina ma auauna o le faiva, na te lei taʻua se ituaiga o tagata ma se atunuu e sau ai. E leai, na faaautu atu lana filifiliga i agavaa faaleagaga o i latou e ono avanoa e auauna i ia tofiga. Ua moni lena mea i toeaina o a tatou faapotopotoga, o ovasia femalagaai, ma tagata o galulue i lālā i aso nei, e pei lava ona sa i ai le vaega pule i le uluai senituri.