Fesili Mai le Au Faitau

Ua taʻu mai e le 1 Ioane 4:18 ia i tatou e faapea: “E leai se fefe [“matau,” NW] i le alofa, a o le alofa atoatoa e faateaeseina ai le fefe [“matau”].” Peitai na tusi mai Peteru: “Ia alolofa atu i le au uso; ia matatau i le Atua.” (1 Peteru 2:17) E mafai faapefea la ona tatou faafesootaia nei fuaiupu e lua?

O Peteru ma Ioane o ni aposetolo na aʻoaʻoina uma e Iesu Keriso lava ia. E mafai ai la ona tatou mautinoa e tatau ona fesootai mea na la tusia. E tusa ai ma fuaiupu o loo sii mai luga, o le faaiuga e fetaui i ai e faapea, sa eseese ituaiga o matau na tautatala i ai aposetolo nei e toalua.

Seʻi o tatou iloiloina muamua la le fautuaga a Peteru. E pei ona faaalia mai i le mea o loo agaga i ai le mataupu atoa, sa tuuina atu e Peteru ni fautuaga faagaeeina i uso Kerisiano e tusa ai o o latou uiga ia i latou o loo i tulaga pule. Pe a tuu i se isi faaupuga, sa ia talanoa e faatatau i le vaaiga saʻo e tatau ona i ai i le gauai atu i vala eseese. O lea, sa ia fautuaina ai Kerisiano ina ia latou gauai atu i tagata o ē o loo i ai o latou tofiga tau pule i faiga mālō faaletagata, e pei o tupu po o kovana. (1 Peteru 2:13, 14) Na faaauau ona tusi atu Peteru: “Ia outou ava i tagata uma; ia alolofa atu i le au uso; ia matatau i le Atua; ia ava i le tupu.”—1 Peteru 2:17.

I le iloiloina o le mea o loo agaga i ai le mataupu atoa, ua manino mai ai, ina ua faapea atu Peteru e tatau i Kerisiano ona “matatau i le Atua,” o le uiga o lona manatu e tatau ona ia i tatou se matuā faaaloalo loloto mo le Atua, o se matau ina ia aua neʻi faia se mea e lē fiafia mai ai le pule e silisili ona maualuga.—Faatusatusa i le Eperu 11:7.

A e faapefea le faamatalaga a le aposetolo o Ioane? Muamua atu i le 1 Ioane mataupu e 4, sa talanoaina ai e le aposetolo le manaoga ina ia tofotofoina “upu faagaeeina” e pei o na o loo puna mai i perofeta pepelo. O na upu e mautinoa e lē puna mai ia Ieova le Atua; e puna mai po o loo faaatagia mai ai le lalolagi amioleaga.

I le faaeseesega, o Kerisiano faauuina e “mai le Atua.” (1 Ioane 4:1-6) Ona o lena tulaga, ua faalaeiau mai ai Ioane e faapea: “Le au pele e, ia tatou fealofani; auā mai le Atua le alofa.” Na taulamua le Atua i le faaalia mai o le alofa—lea na ia ʻauina mai ai lona Alo o le togiola mo a tatou agasala.’ (1 Ioane 4:7-10) O le ā la tatou tali atu e tatau ona i ai?

E manino lava, e tatau ona tatou tumau pea i le autasi ma lo tatou Atua alofa. E lē tatau ona tatou matatau ia te ia, e lē tatau foi ona tatou gatete e faalatalata atu ia te ia i le tatalo. Muamua atu na fautua mai ai Ioane: “Afai e le faasala o tatou loto ia i tatou, e maua ai e i tatou le loto tele i luma o le Atua. O mea uma foi tatou te ole atu ai, e maua mai ia te ia, auā ua tatou tausi i ana poloaiga.” (1 Ioane 3:21, 22) Ioe, o le i ai o se loto fuatia ifo lelei e aumaia ai ia i tatou le saolotoga ina ia faalatalata atu i le Atua e aunoa ma se fefe po o le faatalatu ona o le matau. O lo tatou alofa, tatou te lagona ai le saoloto e talanoa atu, pe faalatalata atu ia Ieova i le tatalo. I lenei itu, ʻe leai ai se fefe [matau] i le alofa.’

Seʻi o tatou tuufaatasia la manatu e lua. E tatau i se Kerisiano ona ia te ia pea se matau faaaloalo ia Ieova, ia faaaloalo loloto ona o lona tulaga, lona malosi, ma lona faamasinotonu. A e tatau foi ona tatou alolofa i le Atua o ia o lo tatou Tamā ma ia lagona le mafana atu ia te ia ma ia saoloto e faalatalata atu ia te ia. Nai lo le faatalatu ona o le matau ia te ia, e tatau ona tatou talitonu e mafai ona tatou faalatalata atu ia te ia, e pei o se tamaitiiti ona saoloto e faalatalata atu i sona matua alofa.—Iakopo 4:8.