Pe a Oo ina ‘Lē Afaina po o Fea e Agi Mai ai le Matagi’

“PE A lē iloa e se tamaloa le taulaga o vaa e taunuu i ai, ona lē afaina lea po o fea e agi mai ai le matagi.” O nei upu na faia e le fai filosofia o Roma o le uluai senituri o Lucius Annaeus Seneca, ua faamautuina ai se upu moni ua leva ona iloaina e faapea: E mo le olaga ia iai se mea e agaʻi i ai, e tatau ona iai ni sini.

Ae peitai, ua masani lava ona faasamasamanoa le olaga e aunoa ma se fuafuaga. O le toatele ua lotomalilie atu lava i so o se mea e tulai mai ina ia alofia ai mea fita ma faigata o le olaga i aso taitasi. E aunoa ma le iai o se fuafuaga mautu, ua pei ai i latou o peau o le sami ua “felafolafoaiina i luma ma tua e le matagi.” (Iakopo 1:6, “Phillips”) E mo tagata faapena, “e lē afaina po o fea e agi mai ai le matagi.”

Ua aumaia e le Tusi Paia faaaoaoga o i latou o ē tausisi atu i se sini, e fai ma faataʻitaʻiga mo Kerisiano i aso nei. O Mose “sa faanaunau . . . i le taui.” (Eperu 11:26) Na tusia e Paulo e faapea: “Ou te momoʻe saʻo atu lava i le tini ina ia ou manumalo i le faailoga.” Na ia faamalosiau atu i uso talitonu ina ia “iai foi lea lava uiga e tasi.”—Filipi 3:14, 15, “Todayʻs English Version.”

A o taulaʻi atu la tatou vaai i folafolaga a le Tusi Paia, seʻi o tatou faaaʻoaʻo i le faatuatua o na tane na tausisi atu i se sini.—Faatusatusa i le Eperu 13:7.