Na Latou Faia Ona o le Alofa

O SEfafine faamaoni ma talimalo i Kanata, ua oti lana tane, sa ia tausia lana fanau teine laiti e toafa i le avea o ni Kerisiano moni. Sa mātauina e toeaina o le faapotopotoga le manaomia o se toe faafouga tele o lona fale. E leai sana tupe na iai ma e leai foi se tomai na te faia ai le galuega. O lea, ina ia tusa ai ma le mataupu silisili i le 1 Timoteo 5:9, 10, na fuafua ai e toeaina ma le lē iloaina e le tuafafine le faia o le galuega mo ia. E faapefea?

Na faia ni fuafuaga mo le fafine ua oti lana tane ma lana fanau ina ia ō ese mo ni aso se lima. E sili atu i le toʻa 80 i le faapotopotoga na lagolagosua ma le loto atoa, i le foaiina atu o ni meaalofa tau tupe, mea faufale ma le taimi. I ni nai minute ina ua ō ese atu le aiga, sa mumu atu loa e pei o ni pi le aufaigaluega filigā i le fale. Na faafou atoa fafo o le fale. Na toe faafou puipui ma vali. O le fola na faalamolemole ma toe faalelei. Na faafou le fola o le fale ma le kapeta. Na toe faaleleia foi mea tau i le eletise ma molī. E oo lava i meafale tuai na toe sui. E na o le lima lava aso na faia ai lenei toe faafouga!

O le siomaga fiafia o le galuega na faagaeetia ai tuaoi. Sa matuā uunaia lava se tasi tuaoi e 80 tausaga le matua i taumafaiga a Molimau, ma aumaia ai lana pulumu valifale ma naunau e fesoasoani atu. O le pule o se tasi o le au tauofo na ia foaiina atu le alaasu mo le ogaumu. Na foaiina atu e se tasi tagata faipisinisi ni kapoti fou mo le umukuka. Na matuā faagaeetia lava se tasi tamaloa ma ia manao ai e fia iloa atili e uiga i Molimau a Ieova. Na ia talia ma le naunautai le lomiga E Mafai ona E Ola e Faavavau i Parataiso i Le Lalolagi.

Na vaaia i foliga o le fafine ua oti lana tane ma lana fanau teine le matuā teteʻi ina ua toe foi ane i lo latou aiga. Na matuā maligi loimata o le fiafia, toē, ma fusifusi—ona o se taimi e lē mafaagaloina o faalogona mafana ma le alofa faa-Kerisiano. O le mea moni, o le alofa moni ma le manatu mamafa mo sui o le faapotopotoga o loo manaomia se fesoasoani, o se faailoga lea o le Faa-Kerisiano moni, auā na tusi mai Paulo e faapea: “O lenei, ia tatou agalelei, ia faatatau i mea e tutupu i lea aso ma lea aso, i tagata uma lava, a e faasili i le aiga o le faatuatua.”—Kalatia 6:10.