‘E Pei Lava ona Faamaai le Uamea i le Uamea’

I LE taufaaiuiuga o le senituri lona tolu, T.A., na iai se tama talavou sogasogā e suafa ia Anthony, o lē sa taʻua faapea o se “Kerisiano o le lotu Coptic,” na tuumuli o ia mai lenei lalolagi ma ana faiga ma ia faaaluina ai le 20 tausaga e nofo toatasi ai i le toafa. Aisea? Na ia manatu o le auala sili lea e auauna ai i le Atua. O ia o se uluai tagata Kerisinetoma na nofo ese na o ia na malolosi taaʻiga o ana aʻoaʻoga.

I aso nei, e itiiti nisi i Kerisinetoma ua faia faapea. Peitai ua tele ma tele tagata ua saili atu i nisi auala e faaesea ai i latou. Ua latou teena le talanoa i isi e uiga i tapuaiga, ma le manatu faapea o sea talanoaga e taʻitaʻiina atu ai i fevaevaeaiga ma misa. O le mea e sili ona faatauaina i a latou tapuaiga o le nofo lelei lea ma o latou tuaoi.

E moni, o le nofo lelei ma tuaoi o se tasi lea o vaega o le tapuaiga moni, ae e iai nisi mea e sili atu ona manaomia. Ua faapea mai se faataoto faaanamua: “E maamaai le uamea i le uamea, e faapea foi ona faamafanafana o le tagata i lana uo.” (Faataoto 27:17) O le mea moni, ua faalaeiauina e le Tusi Paia Kerisiano ina ia faapotopoto faatasi ae lē o le matuā faaesea mai le lalolagi po o isi Kerisiano. (Ioane 17:14,15) Ua faapea mai: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou.” (Eperu 10:24, 25) Ua mulimuli Molimau a Ieova i lena fautuaga. E iai nisi taimi o le vaiaso e latou te potopoto faatasi ai ina ia ‘faamafanafana le tasi i le isi,’ ma ati aʻe ai le faatuatua o o latou uso talitonu. Ua latou iloa o le talanoaina ma le faamaoni o le Tusi Paia e lē taʻitaʻiina ai i misa. Nai lo lea, e taʻitaʻiina ai i le toafimalie ma le filemu. O se vaega tāua lea o le tapuaiga moni.