“Aua Tou te Amo Faalegatasi”

O POVI poʻa e lua o loo faaataina iinei e matuā malolosi tele, e mafai ona la tosoina ma le faigofie avega mamafa. Ae seʻi faapea o se tasi o nei povi poʻa ua suia i se asini. Talu ai o le asini e laitiiti ifo ma e vaivai nai lo le povi poʻa, atonu o le a faatautee ma kiki fusi o saisaitia ai o ia i lenei amo faalegatasi. Ona o se mafuaaga lelei la, na tuuina atu ai e le Atua le tulafono ia Isaraelu e faapea: “Aua e te suatia le fanua i se povi ma se asini e faatasi.”—Teuteronome 22:10.

Na tusia e le aposetolo o Paulo se fautuaga talitutusa faapena e uiga i tagata. Na ia faapea mai: “Aua tou te amo faalegatasi ma e le faatuatua.” (2 Korinito 6:14) E tatau ona teu i mafaufau lenei mea ae maise lava pe a feagai ai ma le filifilia o se paaga faaipoipo. O le faaipoipoga o se faatasiga e tumau, auā na fetalai Iesu: “O e ua faatasia e le Atua, aua neʻi faateaeseina e se tagata.” (Mataio 19:6) E tele tiga e oo i se ulugalii faaipoipo pe afai e lē tutusa o la talitonuga faaletapuaiga, mataupu silisili, ma sini. O lea ua talafeagai ona mulimuli i le fautuaga a le Tusi Paia e faaipoipo “tau lava i le ua i le Alii.” (1 Korinito 7:39) O le faaipoipo atu i se tasi e lē auai i lau tapuaiga e aumaia ai faafitauli e sili atu ona faigata nai lo le tuufaatasia o le povi poʻa ma se asini.

O le eseesega o talitonuga faalotu o le tasi lea o vala e māfua ai ona amo faalegatasi se ulugalii. O paaga ua filifilia—e tusa lava pe tutusa faatuatuaga—e lelei ona fesili ifo, ‘Pe e tutusa ea o ma sini? O fea o le a ma nonofo ai? O ai o le a faasoaina tupe? Pe o le a ma faigaluega uma? Ae e faapefea se fanau? Pe o le a pulea ea le faiā faalefaaipoipoga i le agalelei ma le magafagafa?’

I le tele o tulaga, o le auala e talanoaina ai na mataupu e mafai ona iloa ai pe o le a gatasi le amo pe leai. O le mea moni, e lē tutusa uma tagata e toalua. Ae peitai, afai e mafai e ē o loo tuutala ona faafetaiaia ma foia faatasi o la faafitauli ma afai foi e tatala pea laina o fesootaiga, ona pei ai lea o se amo e gatasi.