Aua le Ita Faamoemoe

E FOLIGA o se luʻitau tele le alofiaina o le ita faamoemoe pe a fai e se tasi se mea leaga ia i tatou. Ua iai i le Tusi Paia fautuaga aogā mo tulaga faapea. “A outou ita,” na tusi atu ai le aposetolo o Paulo, “aua le agasala ai; aua neʻi goto le la o ita pea outou.”—Efeso 4:26.

Pe a agaleaga mai se tasi ia i tatou, o le tulaga masani le iai o se faalagona o le ita. O lea ua taʻua e Paulo “a outou ita,” ua faauiga e faapea i nisi taimi atonu e talafeagai ai le ita—atonu i le tali atu i se faiga lē saʻo po o se faaiʻuga lē tonu. (Faatusatusa i le 2 Korinito 11:29.) Ae pe a tuu ai e lē foiaina, e tusa lava pe faamaonia e saʻo le ita, e mafai ona oo atu ai i iuga matautia, ma taʻitaʻia atu ai i se agasala tele. (Kenese 34:1-31; 49:5-7; Salamo 106:32, 33) O lea, o le ā e mafai ona e faia pe a e lagona ua oso aʻe lou ita?

I le tele o tulaga e aofia ai masei laiti, e mafai ona e foiaina ai le faafitauli i lou lava loto ma le “fifilemu” po o le faalatalata atu i lē na agaleaga mai ma talanoaina le mataupu. (Salamo 4:4; Mataio 5:23, 24) I so o se itu, e sili ona lelei pe a foia le mataupu i se auala vave ina ia lē aati le ita ma iu i ni iuga mataʻutia.—Efeso 4:31.

E matuā faamagaloina e Ieova a tatou agasala, e oo lava i agasala e tatou te faia ma le lē iloa ona o le valea. Pe e lē mafai ai ea la ona tatou faamagalo atu i masei laiti a o tatou uso a tagata?—Kolose 3:13; 1 Peteru 4:8.

O se mea e lelei ona tagai i ai, o le upu Eleni mo le “faamagalo” o lona uiga moni o le “tuuese atu.” O le faamagalo e lē faapea ai ua tatou manatu mamā i le sese po o le faatagaina foi. I nisi taimi e ono uiga ai i le aua le toe manatu i ai i na tulaga, i le iloaina faapea o le ita faamoemoe e na ona faaopoopo i lau avega ma aveesea ai le autasi o le faapotopotoga Kerisiano. E sili atu i lena, e mafai ona faaleagaina ai lou soifua mālōlōina pe a e ita faamoemoe!—Salamo 103:9.