O Fea e Maua Mai ai lo Latou Malosi?
PE AFAI e te tagatagai lelei i le pepe o loo i lenei ata, o le a e iloa ai o le tasi o ona apaau e fa ua matuā lē aogā. Ae peitai, o loo faaauau pea ona ʻai ma feleleai lenei pepe. E lē o se tulaga uigaese lenei. Ua mātauina feleleaiga a pepe e faia i aso taitasi ae 70 pasene o tumutumu o o latou apaau ua faaleagaina.
I tulaga tutusa, e toatele tagata o loo faaalia le lototele maumauai. E ui lava i mafatiaga mai faafitauli ogaoga o le tino ma tau faalogona, ae latou te lē faavaivai ai.—Faatusatusa i le 2 Korinito 4:16.
Na onosaia totino lava e le aposetolo o Paulo tulaga e sili ona faigata a o auai i ana malaga faamisionare. Na sasaina, fasia, fetogia i maa, ma faafalepuipuiina. E lē gata i lea, sa mafatia o ia ona o le lē atoatoa lelei o tulaga o lona tino, atonu o le faafitauli i ona fofoga lea na avea pea ma “mea matuitui i le tino” ia te ia.—2 Korinito 12:7-9; Kalatia 4:15.
O se toeaina Kerisiano e igoa ia Tavita na tauivi ma mafatiaga ogaoga o le mafaufau mo ni nai tausaga, ua ia talitonu i le matuā tāua o le malosi mai ia Ieova lea na toe maua ai lona malosi. “O le tele o taimi, na foliga mai sa mou atu tulaga sologa lelei lea sa faigata ona maua,” o lana faamatalaga lea. “Pe a fesagai ma tulaga e faavaivaia ai, sa ou matuā faalagolago ma le atoatoa ia Ieova, ma sa mautinoa lona fesoasoani mai ia te au. O nisi taimi na ou tatalo ai mo le tele o itula. Pe a ou talanoa atu ia Ieova, ona mou atu ai lea o oʻu faalogona o le tuua toatasi ma le lē aogā. Ua ou tauivi i le tele o taimi i vaivaiga faigata, ae faafetai ia Ieova, ua aumaia e nei vaivaiga le malosi—e oo lava i le malosi e fesoasoani atu ai i isi.”
Na faamalosia e Ieova le Atua Paulo. O lea na mafai ai ona ia faapea mai: “Pe a ou vaivai, ona ou malosi ai lea.” (2 Korinito 12:10) Ioe, o tulaga na faavaivaia ai Paulo na aʻoaʻoina ai o ia e faalagolago atu i le malosi e foaiina mai e le Atua. Ua faapea mai le aposetolo: “Ou te mafaia mea uma lava ona o ia ua faamalosi mai ia te au.” (Filipi 4:13) E mautinoa lava le faamalosia e Ieova o ana auauna.