Faatoese Lē sa Avea ma Faamasino—Ina ua Mavae le 45 Tausaga

I TOTONU o se potu faamasino i Perelini, ia Aokuso 1995, sa faailoa atu ai e lē sa avea ma faamasino i le Faamasinoga Sili, lona salamō i se tasi o Molimau a Ieova ona o se sese na ia faia i le 45 tausaga ua mavae.

Ia Oketopa 1950, na faailoa atu ai e le Faamasinoga Sili a le German Democratic Republic (GDR) le nofosala o Molimau a Ieova e toaiva i lo latou tetee i le atunuu ma faatupu faalavelave ma le auai i faiga faalilolilo. E toalua sa faasalaina e falepuipui mo le olaga atoa, ma le isi toafitu—e aofia ai Lothar Hörnig o se tane e 22 tausaga le matua, o loo lona fa mai le itu taumatau o le ata—sa faasalaina i latou mo se taimi umi i le falepuipui.

O le fasefulu tausaga mulimuli ane, na avea ai le GDR ma vaega o le Federal Republic i Siamani. Na suesueina e alii ofisa nisi o nei faaiuga lē tonu na faia e le GDR ma taumafai ai e faia le faamasinoga tonu mo i latou na aafia ai. O se tasi o na faaiuga lē tonu o le faamasinoga lea o Molimau i le Faamasinoga Sili i le 1950.

O A. T., o lē ua 80 nei ona tausaga, o se tasi lea o faamasino e toatolu na pāsiaina le faaiuga e molia ai Molimau e toaiva i le faamasinoga. O le moliaina i le faia o faaiuga lē tonu, sa ia tulai ai i luma o le Regional Court i Perelini e faamatala le pogai o le faaiuga na ia faia.

I lana saunoaga i le faamasinoga, sa taʻutino ai e lē sa avea ma faamasino e faapea sa ia palota mo se faaiuga o le nofosala i le 45 tausaga ua mavae, e ui lava sa ia manao e faamāmā le faasalaga. Ae o le faamasinoga talu ai ua toe manatunatu ai. Aisea? Talu ai sa faasalaina e le ʻau Nasi ia Molimau a Ieova i le gasologa o le taua lona lua a le lalolagi ona o lo latou teena o le lagolagoina o Hitila. Ina ua mavae le taua ona toe sauāina ai lea o Molimau i le taimi lea o le faiga malo a Komunisi. Sa faapogaia e lenei mea se “mafatiaga tele” i le faamasino.

Na taʻu atu e Lothar Hörnig i le faamasinoga e faapea sa faasalaina o ia i le lima ma le ʻafa tausaga i le tuuina lea o ia i se nofoaga e nofo toatasi ai ma faafalepuipuiina ai i Brandenburg seia oo i le 1959. A o faafofoga i ai lē sa avea ma faamasino i le faamatalaga a Hörnig, ona tutulu ai lea o ia. Sa ia faapea mai: “Ou te faatoese atu, faamolemole faamagalo mai aʻu.” Ona talia ai lea e Hörnig lana faatoesega.—Faatusatusa i le Luka 23:34.

[Ē Ana le Ata i le itulau 32]

Neue Berliner Illustrierte