“Ou te Lē o Moemiti, a Ea?”

O le lipoti lenei mai i Malawi e tusa ai ma se tasi o Tauaofiaga Itumalo uigaese a Molimau a Ieova o “Ē Vivii ma le Olioli” sa usuia i le faagasologa o le taumafanafana i le 1995.

“I TAFATAFA o le aualatele, e tusa ma le ʻafa o le ala agaʻi i le talafatai i sisifo o le Vaituloto o Malawi, sa iai se faailoilo na faatūina iina mo le uluai taimi talu mai le 29 tausaga ua mavae. E faitauina faapenei, ‘Tauaofiaga Itumalo a Molimau a Ieova.’

“Sa paka latalata ane i le faailoilo se loli telē, ma sa ō mai i fafo o lana taavale toso le silia ma le 200 o le ʻau usufono mai le laumua o Mzuzu. Sa latou aumaia afīfī lavalava, o palanikeke, o ulo, o pakete, o meaʻai, o fafie, ma Tusi Paia ina ia auai faatasi ma le 3,000 o o latou uso ma tuafāfine mai isi nofoaga.

“A o matou faafeiloaia le auuso ia sa malaga mai le loli, ae taunuu mai loa George Chikako e 63 tausaga, o loo tulei mai lana uila vilivae i le oneone, sa tietie mai o ia i aso e lua mai Nkhotakota. I le tele o tausaga, sa faasalaina ai faafa le uso o Chikako i le falepuipui ona sa musu e solia mataupu silisili o le Tusi Paia. Na maliu lona tausoga i le sasaina a o falepuipui. ‘Ou te lē o moemiti, a ea?’ o le fesili lea a le uso o Chikako. ‘O lenei tauaofiaga o loo faia i le ao teatea, ma o loo usuina e nei tagata ia pese o viiga o le Malo ma le leo tetele! I le tele o tausaga sa matou feiloai ai i le pogisa i le po, ma taumusumusu le usuina o pese o viiga o le Malo, ma mili faatasi o matou lima pe a patipati. O lenei la ua matou feiloai i luma o le lautele, ma ua maofa tagata i le vāai mai i lo matou toatele auā sa manatu e toaitiiti i matou!’

“O le nofoaga sa faia ai le tauaofiaga sa siomia e le puipui e fai i mutia ma ufiufi i lauvaovao ina ia faapaolo ai. O nai fale e ato i lau ma le fale taalaelae sa fausia e nonofo ai le ʻau usufono. Sa faatumulia le po i leo matagofie o musika ua lē o toe taumusumusu i le mataʻu i sauāga.

“Maeu le talafeagai o le matua o le tauaofiaga ‘O Ē Vivii ma le Olioli’!”

[Ē Ana le Ata]

Mountain High Maps® Copyright © 1995 Digital Wisdom, Inc.