Manatu Fomaʻi Faapitoa e Faaaogā Togafitiga Ese e Suia ai le Toto

E TUSA ma le 200 o fomaʻi faapitoa mai totonu o le Iunaite Setete na feiloai i Cleveland, Ohio, i le Aso Toonai, Oketopa 7, 1995, e talanoaina ai se mataupu o loo tele ina naunau fiailoa i ai le matātā faafomaʻi: o vailaau ma togafitiga e lē faaaogaina ai le toto.

Sa iai nisi o tulaga faigata sa talanoaina. Mo se faaaoaoga, e faapefea pe afai o loo mafatia se tagata maʻi ona o le totovaivai? E mafai faapefea ona togafitia se pepe e fanau lē au e aunoa ma le toto? Pe e mafai ona manuia se taotoga o le fatu e aunoa ma le tuigā toto? O le mea e mataina ai, o taotoga e aunoa ma le toto—e masani ona faaaogaina ai faiga e fesoasoani ai i le tino e faatupuina ai lona lava toto—ua maeʻa ona faatatauina i nei tulaga uma faatasi ai ma iuga lelei.a

Aisea ua tulai ai se manaoga mo togafitiga ese e suia ai tuigā toto? “Ua tatou aʻoaʻoina e faapea o tuiga toto e masani ona feaveaia ai faamaʻi, ae maise lava le atefefete,” o le tala lea a Sharon Vernon, o le faatonusili o le Nofoaga Tutotonu mo Vailaau e Lē Faaaogaina ai le Toto ma Taotoga i le Falemaʻi mo Tagata Matitiva i St. Vincent i Cleveland. Sa ia faaauau mai e faapea: “E tusa lava pe e lē faasolo atu e le toto sina pisia, ae e mafai ona faaitiitia ai le malosi e puipuia ai le tino o le tagata maʻi mai i faamaʻi.” E ui lava o le pipisi atu o le AIDS ua mafai ona faaitiitia ona o le suesueina maeʻaeʻa o le toto, ae e tumau pea ona iai le tele o isi faamaʻi e lē o mafai ona mauaina i na suesuega. Ma e ui lava i le manaoga mo sauniuniga atili, a ua faamaonia le faasaoina o tupe a falemaʻi i se taotoga e lē faaaogaina ai le toto, auā e soloia ai faafitauli faaletulafono atonu e iu i ai pe a tuiina se toto ua pisia i se faamaʻi i se tagata maʻi.

I Molimau a Ieova, o loo iai se mafuaaga e sili ona tāua mo le alofia o le faaaogaina o le toto: E faasaina e le tulafono a le Atua. (Galuega 15:29) Ae e tumau pea ona latou mananao e maua ia togafitiga faafomaʻi e aupito sili ona lelei pe a mafai ai. O lea, ua latou felagolagomai ai ma fomaʻi o ē o loo matuā tinou e faia sailiiliga i togafitiga faafomaʻi e lē faaaogaina ai le toto. O ia aogā e lē na o Molimau a Ieova e mauaina ae faapea foi le toatele o isi o ē o loo manatu mamafa e uiga i le lamatiaga o tuiga toto.

[Faaopoopoga i lalo]

[Ē Ana le Ata i le itulau 32]

WHO photo by P. Almasy