O Ai o le a Avea ma ʻau Faievagelia?

I SE fono a le Faalapotopotoga Aoao o Lotu a le Lalolagi ua tusa nei ma le 40 tausaga ua mavae, na uunaia ai sui usufono ia “gaoioi loa e faaalia se agaga faaevagelia” ma ia aʻoaʻoina a latou lafu e “ō atu e fai le galuega faaevagelia.” I le lima tausaga mulimuli ane na tusi ai e John A. O’Brien, o se taʻitaʻi lotu Katoliko, i le manaoga o le aumaia i totonu o soo fou “e ala i le ō atu ia i latou” ae lē na o le “nonofo i o tatou fale.” Ia Ianuari 1994, na faapea mai ai Pope Ioane Paulo II “e lē o le taimi lenei e mā ai i le Tala Lelei, o nei le taimi e talaʻi atu ai ma le leotele i tagata uma.”

E manino mai ua faataligatuli tagata i lenei valaaulia mo le ʻau faievagelia lea e fai mai lea taimi i lea taimi. Ua faapea mai se tala i se mataupu o le nusipepa Ausetalia o le Illawarra Mercury: “I le Talafatai i Saute [o Ausetalia], e leai se naunau o tagata Katoliko lauiloa e talia le ituaiga faiga o fai e Molimau a Ieova e avea ma vaega o lo latou faatuatuaga.” Na fai mai se tasi tamaloa o le faaevagelia “e lē o se vaega o mafaufauga faa-Katoliko.” Ua finau mai le tasi: “E lelei pe a faaauiluma e le lotu ia lava, ae e lē ala mai i le tuʻituʻi faitotoa. Atonu e sili pe a aʻoaʻoina mataupu faalelotu i aʻoga po o le tufa atu o le feau faaevagelia i pusa meli.” E oo lava i le patele i le falesa o lena vaipanoa sa lē iloa lelei faauiga upu a le Pope. Fai mai o ia: “Matou te faalaeiauina tagata ia ola aʻe e tusa ai ma le evagelia lea ua latou iloa i o latou lava olaga. Ae e lē fia faia soʻu manatu e uiga i le tuʻituʻi faitotoa.” Ua taaofai lelei e le ulutala o le mataupu o tala fou lenei manatu: “O le a lē faalogo tagata Katoliko i le talosaga a le Pope ina ia ō e talaʻi.”

E ui ina lē taulau Kerisinetoma i le faaevagelia, ae sili atu i le lima miliona Molimau a Ieova o loo mulimuli i le poloaiga a Iesu e “o atu e fai nuu uma lava ma soo.” (Mataio 28:19, 20; faatusatusa i le Galuega 5:42.) O la latou talaʻiga mai lea fale i lea fale o loo faatino nei i le silia i le 230 atunuu. O le feau o loo latou tauaveina o se feau mautinoa, o loo faamatilatila ai folafolaga matagofie a le Tusi Paia mo le lumanai. Aisea e te lē talanoa atu ai ia i latou pe a toe asiasi atu?