O Ai e Tuuaʻia i Taua?

PE E tuuaʻia ea le Atua i taua o tauina e tagata? “E leai, e lē finagalo le Atua i taua.” O le tali lena a Martin Niemöller, o se taʻitaʻi lotu Porotesano lauiloa i Siamani, i lenei fesili a o lei leva ona mavae le Taua Lona Lua a le Lalolagi. O ona manatu na lomia i le 1946 i se tusi ua taʻua o le Ach Gott vom Himmel sieh darein—Sechs Predigten (Le Atua e, Silasila Mai le Lagi—Lauga e Ono).a Ua faapea mai le tusi:

“Po o ai lava e manao e tuuaʻia le Atua i [taua] e na te lē iloa, pe e na te lē fia iloaina foi le Afioga a le Atua. O le mea moni, e ese le fesili, pe faamata o i tatou o Kerisiano pe leai, o le pogai autū lea o le faaauauina pea o taua. Ma e lē faigofie ona tatou alofia lenei fesili. . . . E mafai foi ona manatua ma le saʻo e faapea o lotu Kerisiano, i le faagasologa o tausaga, na faifai pea ona tauofoina atu faalausosoo la latou lagolagosua i le faamanuiaga o taua, o vaegaʻau, ma auupega ma na latou tatalo i se auala e sili ona lē faa-Kerisiano mo le faaumatiaga o o latou fili i le taua. Ua māfua nei mea uma ona o i tatou ma o tatou augātamā, ae e mautinoa e lē tuuaʻia ai le Atua. Ma o i tatou Kerisiano i aso nei e ao ona masiasi i le vaai atu i ē ua taʻua o se lotu mavae e pei o Tagata Aʻoga Maelega o le Tusi Paia [Molimau a Ieova], o ē e faitau selau ma faitau afe na faafalepuipuiina ma [oo lava] ina maliliu ona o le teena o auaunaga faavaegaʻau ma mumusu e auai i fasiotiga tagata.”

I aso nei, pe ā ma le 50 tausaga talu ona mavae le Taua Lona Lua a le Lalolagi, ae o upu a Niemöller ua faatupu manatu i tagata o loo naunau i le filemu. E leai, e lē tuuaʻia le Atua i le toto masaa o atunuu! O le mea moni, e ala i ana auauna moni, o ē ua lē auai i fetauaiga a le lalolagi, ua folafola e le Atua le matuai lalata mai lava o le mutaaga o taua uma.—Salamo 46:9; Ioane 17:16.

[Faaopoopoga i lalo]

[Ē Ana le Ata i le itulau 32]

USAF photo