Le Upu Moni e Uiga i Seoli

UA TAʻUA e se lipoti tau aʻoaʻoga a le Lotu Egelani e faapea, e ui i le eseesega o mantu, o seoli e lē o se afi; nai i lo lea, o se nofoaga e matuā gaogao, pe a manatu moni atu i ai. Ua faamatalaina e le lipoti e faapea: “E tele mafuaaga mo lenei suiga. Ae o nisi o na mafuaaga, o le tetee mai ia i latou o loo i le faatuatuaga Kerisiano ma ē foi e lē o ni Kerisiano e faasaga i se lotu tau faamataʻu, faapea ma se tuputupu aʻe o le iloaina e matuā ese le ituaiga o Atua lea e faapuapuagatiaina e faavavau le faitau miliona o tagata, mai le alofa o le Atua lea na faaalia ia Keriso.”

E lē patino i le Lotu Egelani lenei lagona lē mautonu i le vaaiga masani e uiga i seoli. E faafaigata i tagata mai i ituaiga lotu eseese ona tapuai atu i se Atua e tauimasui o lē e susunuina tagata agasala. Ua faapea mai le polofesa o lotu ma tagata a lautele i le Duke University’s Divinity School, o Jackson Carroll: “E mananao tagata i se Atua mafana ma e alofa. E ese mai mafaufauga faaonaponei o le lē fia talanoa i faatatau i le agasala ma sese.”

Ua leva ona talitonu Molimau a Ieova e faapea o seoli, e pei ona aʻoaʻoina e le Tusi Paia, ua na o se tuugamau mo tagata ua maliliu—ae e lē o se nofoaga e faapuapuagatia ai i le afi. E lē faapea e latou te talitonu i lenei mea ona o le taatele o lena talitonuga, ae ona o le faamatalaga a le Tusi Paia lea e faapea: “A o e ua oti, latou te le iloa se mea . . . E leai se galuega, po o se mafaufau, po o se iloa, po o se poto i le tuugamau [“hele,” Catholic Douay Version].”—Failauga 9:5, 10.

I lenei malamalamaga manino i le tulaga o le tagata ua maliu, na tusia ai e le uluai peresitene o le Sosaiete o le Olo Matamata o Charles Taze Russell i tuā i le 1896 e faapea: “Tatou te lē maua [i le Tusi Paia] se mea e faapuapuagatia ai e faavavau e pei ona aʻoaʻo sese e aʻoaʻoga ma tusi pese faalelotu, faapea ma le toatele o taʻitaʻi lotu. Ae ua tatou iloa [mai le Tusi Paia] o ‘seoli,’ sheol, hades, lea na faasalaina uma i ai tagata ona o le agasala a Atamu, ae ua toe togiolaina uma ona o le maliu o lo tatou Alii; ma o lena ‘seoli’ o le tuugamau—o le tulaga oti.”

O lea ua silia i le senituri talu ona aʻoaʻoina e Molimau a Ieova le upu moni faale-Tusi Paia e uiga ia seoli.

[Ata i le itulau 32]

Charles T. Russell