O Ai o Loo Puleaina?
“O AI o loo pulea le lalolagi?” Afai e fesili atu faapena se tagata ia te oe, o le a faapefea ona e tali atu? O le toatele o tagata lotu atonu e faapea mai o le “Atua” po o “Iesu.” Na avatu e se mataupu o i le nusipepa The Freeport News i Bahamas, se tali atonu na lei faatalitalia e le toatele o tagata.
Na amata mai faapea e lē na tusia le tala: “Na ou mauaina se sāvali i luma o loʻu faitotoa. E masani lava ona ou lē faitauina ni mea faapena, ae i lena taimi na ou manatu ai e faitau. Na faaulutalaina i le fesili e faapea, ‘O Ai Moni O Loo Pulea Le Lalolagi?’” E ala i le faitauina o le sāvali faale-Tusi Paia, ua aʻoaʻoina ai e lenei fafine e faapea o le pule o lenei lalolagi e lē o le Atua po o Iesu a o Satani le Tiapolo.—Ioane 12:31; 14:30; 16:11; 1 Ioane 5:19.
Ua faamalamalama mai e le sāvali e faapea: “Manatunatu i le tele o le toto masaa ona o sauaga ogoogo. Ua faaaogā e tagata potu kasa, nofoaga e faapologa ai, o fana ma pomuafi, ma isi faiga inosia e faatiga ma fefasiotiai ai e aunoa ma le alofa. . . . O ā mana o loo uunaia ai tagata e faia na gaoioiga inosia pe maileia ai i latou i tulaga latou te lagona ai le faamalosia ina ia auai i gaoioiga e sili ona leaga? O e tau manatunatu ea po o se mana lē vaaia amioleaga o loo taaʻina ai tagata ina ia auai i na faiga sauā?” Pe o se mea e faateia ai ea le taʻuaina e le Tusi Paia Satani o “le atua o le lalolagi nei”?—2 Korinito 4:4.
O se mea e fiafia ai ua toeitiiti nei lē toe iai Satani ma ana temoni. “E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:17) Ioe, ua folafola mai e le Tusi Paia e iai le faamoemoe e ola ai e faavavau ē o faia le finagalo o le Atua i se lalolagi fou amiotonu. (Salamo 37:9-11; 2 Peteru 3:13; Faaaliga 21:3, 4) Maeu se saʻolotoga o le a iai pe afai e aveesea le aafiaga leaga a Satani ma ana temoni!
Ina ua uma ona aotele faamatalaga o lenei sāvali laititi, na faapea mai upu faaiu a le tusitala i le mataupu The Freeport News: “Na ou matuā fiafia lava ina ua ou faitau i lena sāvali . . . auā na ou popole foi i le tulaga o loo iai le lalolagi, ma po o ai o loo puleaina.”