Tali Atu i Tuuaiga Sese i Falani

I SE taimi e lei leva tele atu na avea ai Molimau a Ieova i Falani ma taulaiga e faafaupue i ai tuuaiga sese. I le faamatilatilaina o mea matuia o loo tutupu na aafia ai lotu mavae i Europa ma Iapani, sa faasalalau ai e le au fai talafou ni faamatalaga lē saʻo e uiga i Molimau. Sa taʻua sese i latou e faapea o se tasi o lotu mavae e aupito sili ona toatele ma e sili ona matautia.

I se taumafaiga ina ia faasaʻoina ia mataupu, sa lomiaina ai e Molimau a Ieova se sāvali e taliina ai fesili e pei o nei: O ai Molimau a Ieova? Pe o i latou ea o ni Kerisiano? Pe latou te taliaina ni togafitiga faafomai? Aisea e latou te ō atu ai mai lea fale i lea fale? Ua faapefea ona faatupeina la latou galuega? E faapefea ona aogā Molimau a Ieova i le lautele?

O le sāvali ua saunia lelei i le gagana Falani sa faaulutalaina e faapea, Molimau a Ieova—Mea e Manaomia Ona E Iloa. (Jehovahʻs Witnesses—What You Need to Know.) Ina ia oo atu le sāvali i le tele o tagata e mafai ona maua, sa fuafuaina ai se tauiviga faapitoa. Na amata mai ia Me 13 seia oo ia Iuni 9, 1996, e silia ma le iva miliona kopi sa tufaina atu.

O lenei sāvali na fiafia i ai le toatele, e aofia ai ma tagata maualuluga o le malo. “O faitioga faasaga i Molimau a Ieova ua faatupu ai loʻu ita,” sa tusi mai ai se tasi o faipule ina ua uma ona ia faitauina lea sāvali. “O le tele o taimi ua oo ina ou talisapaia uiga agalelei ma le lē manatu faapito ua faaalia e la outou galuega.” I le tali atu i le sāvali, na tusi atu ai se sui o le Palemene i Europa e faapea: “O le toatele lava o tagata ua latou iloa lelei lava le auala e eseese ai tagata Kerisiano e pei o outou ma lotu taufaasese.”

I Brittany, na tuuina atu ai e se Molimau se sāvali i se patele, o lē na ia taliaina lelei. Na faapea mai le patele: “Ou te faamālō atu ia te outou mo le galuega o loo tou faia.” Ona ia toe faaopoopo mai lea: “Ua ou faalaeiauina laʻu vasega o fesoasoani ina ia faataga outou i o latou fale ma avatu se ipu kofe mo outou. E mafai foi ona outou faailoa ia i latou tou te feiloai faapea na tou oo mai i loʻu fale. Ou te fia taʻu atu foi ia te outou e faapea ou te talisapaia le faitauina o a outou lomiga.”

Ina ua ia mauaina le sāvali, sa tusi talosaga atu loa se tamaloa Porotesano i Alsace i le Sosaiete o le Olo Matamata mo se suesuega faale-Tusi Paia. Na ia tusi mai e faapea: “O lea ua ou lē faatuatuaina laʻu lotu. Ua ou naunau ai lava i se isi amataga fou faaleagaga.” E ui lava i moliaga sese i nisi taimi faasaga ia i latou, o Molimau a Ieova i Falani—o le mea moni, i isi itu uma o le lalolagi—o loo faaauau pea ona fesoasoani atu i tagata ina ia latou mauaina se poto saʻo e uiga i fuafuaga a le Atua, e pei ona faataatia mai e le Tusi Paia.—2 Timoteo 3:16, 17.