Ua Mautinoa le Lava o Meaʻai mo le Lalolagi i le ā le Auala?

“O A TATOU taumafaiga e sili ona lelei atonu e lē lava lea e faaauau ai ona lava meaʻai e pei ona iloa ai i lenei senituri,” o le faamatalaga lea a Lester Brown, le peresitene o le Worldwatch Institute i Washington, D.C. E tusa ai ma le mekasini o le New Scientist, i le amataga o le 1995, o saito a le lalolagi atoa o loo faaleoleo ua paʻū ifo i lalo i le 255 miliona tone—e na o le 48 aso e faaaogā ai e le lalolagi. I tausaga ua tuanai pe a paʻū ifo i lalo le fua o meaʻai e faaleoleo sa lava mo le 60 aso, sa mafai lava ona toe maua nisi meaai. Ae i le taimi nei ua lē mautinoa e le Worldwatch pe e mafai e le laueleele ona toe maua mai mea ia ua lē o toe iai.

Ina ua mavae le tolu tausaga ua lē o lava saito o selesele mai, ma le tele o atunuu tauatiaʻe o loo faaaogaina saito e fafaga ai manu, ua itiiti ai saito o totoe mo ē matitiva o loo manaomia mo lo latou fofoga taumafa i aso fai soo. Ua lapatai mai le New Scientist e faapea afai e lē uaʻi vave atu i lea tulaga, o le a oo foi ina fia aai ai ma le tasi piliona o tagata o loo faaaluina le itiiti ifo ma le 70 pasene o a latou tupe maua i meaʻai.

Na valoia e le Tusi Paia e faapea o ē o aināina le lalolagi i o tatou taimi o le a oo ia i latou “oge.” (Luka 21:11) Peitai e lē faapea ua lē o manatu mai le Atua i le faafitauli. O le mea moni, o lona naunau mai mo le tulaga faigata o le tagata o le a iu ina faaalia mai pe a pule lona Malo i mataupufai o le lalolagi. I lena taimi e “fua mai e le laueleele ona lava fua.” “E taumafa o saito i le nuu i tumutumu lava o mauga.” (Salamo 67:6; 72:16) Ona faataunuuina ai lea o upu faavaloaga ia e faatatau i Lē na Foafoaina Mea: “Ua e asiasi i le laueleele, ma e faasūsūina lava; . . . ua ufitia foi vanu i le saito.”—Salamo 65:9, 13.

Pe faatosina loto ea lena folafolaga ofoofogia ia te oe? Pe e te fia iloa pe faapefea ona avea oe ma sona vaega? Ia fesili atu nei i Molimau a Ieova i se isi taimi e toe asiasi atu ai i lou aiga, ina ia faamatala atili atu ia te oe lenei Parataiso folafolaina. Afai e te manao e asiasi atu se tasi e faia se suesuega faale-Tusi Paia ma oe i lou aiga e aunoa ma se totogi, faamolemole tusi atu i le I.B.S.A., Box 673, Apia, Western Samoa, po o se tuatusi talafeagai o loo lisiina mai i le itulau e 2.

[Ē Ana le Ata i le itulau 32]

Inset: Pictorial Archive (Near Eastern History) Est.