Ua Lagolagoina e le Faamasinoga Sili i Connecticut Aiā Tatau a se Tagata Maʻi

IA APERILA 16, 1996, na lagolagoina ai e le Faamasinoga Sili i Connecticut i le Iunaite Setete o Amerika aiā tatau a Molimau a Ieova e lē talia ai tuigā toto. Na suia e lenei faaiuga se faaiuga a se faamasinoga muamua.

Ia Aokuso 1994, na amata ai ona matuā alu le palapala o Nelly Vega, o se tasi o Molimau a Ieova ina ua maeʻa ona fanau mai lana tama muamua. E lei aogā taumafaiga ina ia taofia le alu o lona palapala. A o faasolosolo ina leaga le tulaga o le faletua o Vega, na sailia ai e le falemai le maua mai o se poloaiga mai le faamasinoga ina ia faatagaina se tuigā toto. Ua maeʻa ona sainia e le faletua o Vega se pepa o faatonuga (medical release), lea e faatonuina ai lē leai o se toto po o vaega autū o le toto, e avatu ia te ia a o iai i le falemai, ma ua faapena ona faamatuu mai ai le falemai i so o se tuuaiga ona o lana filifiliga. E ui lava i lea, na finau lava le falemai faapea o le faamalosia o se tuigā toto o se gaoioiga mo le lelei o le pepe faatoʻā fanau, lea e pei ona finau mai ai le falemai, e na te moomiaina lona tinā. Na popole foi le faamasinoga e faapea e ese mai i le alu o lona palapala, ae o loo talavou ma o loo lelei pea le soifua maloloina o le faletua o Vega. O lea, e ui i teteega a le tane a Vega faapea ma lana loia, ae na tuuina atu lava e le faamasinoga le faatagaga ma iu ai ina tuiina atu i ai le toto.

Mulimuli ane, na tuuina atu lenei mataupu i le Faamasinoga Sili i Connecticut. Iina, na ioe faatasi ai e faapea na solia e gaoioiga a le falemai aiā tatau a le faletua o Vega. Na faapea mai le faaiuga: “Na faia le faamasinoga i le tulua o po ma ao, i lalo o tulaga na sili ona matuia o le faalavelave, lea sa lei fesoasoani ai lenei tulaga i vaega uma e lua ina ia faia ni filifiliga lelei.”

E lē na o Molimau a Ieova e tāua ai lenei faaiuga a le Faamasinoga Sili i Connecticut. Ua faapea mai Donald T. Ridley, le loia a le faletua o Vega: “E tāua i tagata mamaʻi uma o ē e lē ioe i filifiliga a o latou fomai. O le a taofia e le faaiuga, falemai mai le lē amanaiaina o mea e faatāuaina e tagata mamaʻi, pe faalelotu pe faalelalolagi.”