Na Latou Tutū Maumauai i Sauaga a le Pulega a Nasi

UA MATUĀ tu matilatila le faamaoni ma le lē fefefe o Molimau a Ieova i le pulega a Nasi i Siamani e ese ai mai le tulaga o lotu a Kerisinetoma. Na tusi le polofesa o talafaasolopito o John Weiss e faatatau i lenei mea, i lana tusi Ideology of Death. Ua ia tusi mai e faapea:

“I le 1934, na tausisi ai le lotu Faaevagelia e tatau ona ‘talia fiafia e tagata lotu Luteru’ le pulega a Nasi, ma ‘faafetai i le Alii le Atua’ mo le aumaia i tagata Siamani o se ‘taʻitaʻi mapolotu ma mau faatuatuaina.’ . . . Na tusi atu se epikopo Porotesano i ona taʻitaʻi lotu e faapea ‘ua auina mai e le Atua [Hitila] ia i tatou.’” Ua faaauau mai faapea Weiss: “O le lotu Metotisi i Siamani . . . ua ioe faatasi ma le epikopo o Dibelius e faapea ua laveaiina e Hitila Siamani mai se fouvalega lea na lalata tele ane a le au Bolshevik, ua aumaia ai le filemu ma le mausali . . . Ma na faailoa atu e le ekalesia Mamona i ona tagata lotu e faapea o le tetee ia Hitila, e solia ai tulafono a le Mamona.” Ma na ia faaopoopo mai e faapea: “Na taʻu atu i tagata Katoliko o se tiute paia le usiusitai atu i le pulega fou, ma o se tiute na faaauau pea e oo lava i le taimi na iloa ai e taʻitaʻi lotu faiga e matautia le leaga na faia e Nasi i Europa i Sasaʻe.”

Ae faapefea Molimau a Ieova? Na faapea mai le polofesa o Weiss, “i le avea o se vaega, na o Molimau a Ieova lava na teena le pulega a Nasi.” Sa faapea atili mai le polofesa o Weiss o le faitauafe o i latou na faafalepuipuiina, “ae peitai o so o se Molimau lava na auina atu i se nofoaga o faasalaga e mafai ona magalo mai i tua i le na o le sainia lava o se pepa e faailoa atu ai lona lē toe auai i le tapuaiga.”

E faatatau i le faamaoni o Molimau a Ieova, sa tusia faapea e le polofesa o Weiss: “Ua faaalia e la latou faataitaiga le uigaese o le aafiaga ma le matuā maumauai o le uluai faiga faa-Kerisiano i le taimi e lei aloaia ai, ma i le taimi foi na faamuamua ai mea mo le sosaiete nai lo le faanaunauga e ola i se olaga faamaoni. E pei ona tusia e se faifeau Porotesano e faatatau ia i latou, ‘O tagata nei na taʻu pepeloina ma ulagia, na latou muamua tutū e tali atu i le toasa a le temoni i Nasi, ma na latou matuā loto tetele e tetee atu e tusa ai ma o latou talitonuga, ae lē o lotu lauiloa o Kerisinetoma.’”