Lipoti a Ē Faalauiloa le Malo

Le Mana o le Afioga a le Atua e Mafai Ona Faamamā Ai

UA LIPOTIA mai e faapea o le toatele lava o tagata ua pulea e fualaau faasaina, pe a toe teteʻa i tua mai nofoaga ia sa tau togafitia ai o latou faafitauli, e masani lava ona toe foi atu i a latou masaniga. Peitai e mafai e le Afioga a le Atua ona faataulauina se mea ua masani ona lē taulau ai na nofoaga o togafitiga. (Eperu 4:12) E toatele ua aogā i ai le Afioga ma le agaga o le Atua ina ia manumalo mai le pulea e fualaau faasaina ma latou faatatauina le fautuaga: “Ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.”—2 Korinito 7:1.

Ua faamaonia mai lenei mea i se mea na tupu i Myanmar. Ua faamatala mai e se tamaloa e tele tausaga o faataugā ona ua puleaina e fualaau faasaina, e faapea: “Na amata ona pulea aʻu e fualaau faasaina a o oʻu talavou lava. O le tele o taimi sa ou taumafai ai e tuu, ae na ou lē mafaia. Ina ia faatupeina pea loʻu faaaogaina o fualaau faasaina, na iu ai lava ina ou gaoi. O le iuga, na faafalepuipuiina ai aʻu i le 1988, mo le tausaga atoa.

“Ina ua ou magalo mai le falepuipui, sa ou toe alu atu ai e vaai aʻu uo sa iai muamua. E lei umi ae ou toe foi i le masaniga o le faaaogā o fualaau faasaina. O lenei olaga na ou faaleagaina ai aʻu lava, na iu ina faamuta uma ai e isi o loʻu aiga le toe aumea mai ia te au. E lē gata i lea, o laʻu amio fouvale na fefefe ai le toatele o tagata o le nuu ia te au, ma amata ai foi ona latou alofiaina aʻu.

“Ae i se tasi aso, na tupu ai se mea na matuā lē maalofia—na matuā ou tigaina ona ua ova fualaau i totonu o loʻu tino. Na toe ave aʻu i le falepuipui, ae i lena taimi ua tolu tausaga o loʻu faasalaga. E ui i le matuā leaga o le olaga i totonu o le falepuipui, ae na mafai lava ona ou sao mai ai.

“Ina ua ou magalo ma toe foi atu i le aiga, sa ou talosagaina ai le faamagaloga a loʻu aiga mo aʻu measese i taimi ua tuanai. Sa latou toe taliaina ma le agalelei aʻu, ae peitai, na toe faatosina mai foi aʻu uo ina ia ou foi atu i oʻu ala tuai.

“Na iu lava ina talosaga atu le tinā o loʻu tamā i se faifeau o lo matou lotu pe mafai ona avatu aʻu ina ia auai i se aʻoga faale-Tusi Paia. Na malie le faifeau. Peitai, a o lei amata ona ou auai, na faapea mai le tuafafine o loʻu tamā, ma o ia o se tasi o Molimau a Ieova, pe afai ou te manao moni lava e aʻoaʻoina le Tusi Paia, e tatau ona ou suesue ma Molimau.

“Sa ou alu atu i le Maota o le Malo ma na faafeiloaia aʻu e se tamaloa o lē na malie e na te faia laʻu suesuega faale-Tusi Paia. E toatele le aofia na latou faafeiloaia ma le mafana aʻu ma sa ou lagona ai lo latou naunau moni mai.

“Ina ua amata ona ou suesueina le Tusi Paia ma auai i sauniga faa-Kerisiano, na suia ai loʻu faananau atu mo fualaau faasaina, i se faanaunauga ina ia vavalalata atu i le Atua. E tasi le tausaga mulimuli ane, ua ou agaigai atu i le tulaga o le tuuina atu o loʻu ola ia Ieova le Atua, ma na faailogaina lena tuuina atu i le papatisoga i le vai.

“E talu ai nei lava, sa ou talaʻi atu ai mai lea fale i lea fale, sa ma feiloai ai ma se tasi o aʻu aumea a o pulea aʻu e fualaau faasaina. Na matuā lē malamalama o ia i suiga mataina ua mafai ona ou faia. Na mafai e lena mea ona maua ai se avanoa mo le molimau atu, ma na mafai ona ou talanoa atu ia te ia e faatatau i le faamoemoe o le Malo.

“O lenei ua iu ina ou mauaina le fuafuaga moni ma le uiga o le olaga. E faafetai ai i le fesoasoani mai a le Atua ma fautuaga mai lana Afioga, o lenei ua mafai ai ona ou fesoasoani atu i isi ina ia latou ō ese mai le masaniga leaga o le faaaogaseseina o fualaau faasaina.”