Taimi Faigata mo Ē ua Matutua
O LE tinā o Oniyan, o lē ua 68 tausaga lona soifua, e alala i se aai tele i Aferika i Sisifo. A o laitiiti lava, sa ia manatunatu a oo mai taimi o lona tagata matua, e fia ola i se olaga fiafia e lē toe faigaluega, ae siosio e ana fanau ma fanau a ana fanau. Nai lo lena ua faaaluina lona taimi e faatau atu ai ia vaiinu malulu i le vevela o le la. O si tupe itiiti lava na te maua e fesoasoani lea ia te ia e ola ai. O lana fanau tama e toalua e nonofo i le isi atunuu e mamao ese. Ua leva tele talu mai le taimi mulimuli na la lafoina ane ai se tupe ia te ia.
I vaitaimi ua tea, sa maualuga tele le manatu atu i tagata matutua i Aferika. Sa faaaloalogia i latou ona o le tele o lo latou poto masani ma lo latou iloa, faapena foi ma le atamai ma le faautauta e masani lava ona ia i latou. Sa latou fesoasoani e tausia aʻe fanau a a latou fanau. O ē laiti e saili atu mo a latou fautuaga ma faamaoniga. Sa soifua tagata e tusa ai ma le fautuaga faale-Tusi Paia e faapea: “Ia e tulai atu i luma o le ua ulu sinā, ia e ava foi i luma o le toeaina [po o le loomatua].”—Levitiko 19:32.
Ua suia taimi. Ona o oge, le sii maualuga o le tau o le soifuaga, le leai o ni galuega, ma le faatuputeleina o tagata ua faimalaga atu e nonofo i aai, ua tuua ai le toatele o tagata matutua e tausi e i latou i latou lava. Na taʻua e le faatonusili o le HelpAge (faalapotopotoga e taulimaina faafitauli o tagata matutua) i Kenya, e suafa ia Camillus e faapea: “O le aganuu o le tausia ma lagolagoina tagata matutua ua faatupulaia le lē amanaiaina e tagata.”
O le mea moni, o le faavaivaia o sootaga i le aiga e lē na o atunuu Aferika o loo maua ai. Na lipotia mai e le Guardian Weekly i Iapani e faapea: “O le tuutoina atu o fanau sa masani ona avea ma malosiaga o amioga tatau i Iapani e pei ona faatulaga ai e le Confucianism, ae ua mou atu a o suia mai i olaga i nuu maotua i olaga i aai atoa ma le faavaivaia o sootaga faaleaiga: i aso nei, e 85 pasene o tagata Iapani e maliliu i maota gasegase po o fale e tausi ai tagata matutua.”
Po o le ā lava le tulaga e iai, o i latou e mananao moni e faafiafia le Atua latou te taumafai malosi e ava i o latou mātua. Latou te utagia le fautuaga a le Tusi Paia ua faapea mai: “Ia e ava i lou tamā ma lou tinā . . . ina ia manuia ai oe, ma ia e nofo tuluʻi ai i luga o le laueleele.” (Efeso 6:2, 3) E ui lava e lē faigofie i taimi uma ona ava ma tausi atu i mātua ua matutua, ae e mafai ona maua mai ai taui faaoaina.