Se Lamepa e Taitaia ai Oe i Ala o le Olaga

“IEOVA e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” (Ieremia 10:23) O upu nei na faaalia ai e le perofeta o Ieremia, e lē mafai e tagata ona faatautaia ma le manuia ala o le olaga pe a aunoa ma se fesoasoani. O fea e mafai ona maua mai ai lena fesoasoani? Ua taliina e le faisalamo i lana tatalo ia Ieova le Atua e faapea: “O lau afioga o le sulu lea i oʻu vae, ma le malamalama i loʻu ala.”—Salamo 119:105.

O i latou ua suesueina le Afioga a le Atua, le Tusi Paia, ma faatatauina mea o fai mai ai, o le a faapei i latou o se tasi e na te amataina se faigamalaga umi i le vaveao. Muamua lava, e lē mafai ona ia iloa atu le tele o mea auā o loo pogisa. Peitai a o amata ona oso aʻe le la, e faasolo ina tele mea ua ia iloa atu. E iu lava ina tu saʻo le mata o le la ma susulu ifo i ona luga. Ona ia matuā iloa manino atu loa lea o mea uma lava. O lena faataitaiga e faamanatu mai ai i se tasi le faaupuga faafaataoto a le Tusi Paia e faapea: “O le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.”—Faataoto 4:18.

Ae faapefea i latou o loo teena taiala a le Atua? Ua faapea mai le Tusi Paia: “O le ala o e amio leaga e tusa lea ma le pogisa; latou te le iloa le mea latou te tausuai ai.” (Faataoto 4:19) Ioe, o ē amioleaga ua faapei o le tagata o loo tausulu solo i le pogisa. O ni tulaga manuia e foliga mai o loo latou tau mauaina e lē tumau, auā “e leai lava se poto, e leai se mafaufau, e leai se pule e tetee atu ia Ieova.”—Faataoto 21:30.

O lea la, ia mulimuli atu i le taitaiga a le Afioga a le Atua, le Tusi Paia. Pe a e faia faapea, o le a iloaina ai le moni o upu a le Faataoto 3:5, 6: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”