Teuteuina i se Tautaliga Auro

MAI taimi anamuā, sa matuā faatāuaina mea teuteu tino auro ona o le tautele ma lona matagofie. I le avea ma palemia i Aikupito, sa maua ai e Iosefa se filifili auro mai ia Farao. (Kenese 41:42) Sa avatu ia Repeka se mama auro ma taulima auro se lua, e tusa ma le 1,400 tālā (Amerika) lona tau i aso nei. (Kenese 24:22) Ma le mautinoa, o nei meaalofa tāua na taliaina ma le loto faafetai ma na faaaogaina ma le mitamita.

Ua taʻua e le Tusi Paia ia mea teuteu tino faafaatusa ia e matuā sili atu lo latou tautele nai lo mea teuteu tino ia sa faaaogaina e Iosefa ma Repeka. Ua faapea mai le Faataoto 25:12: “O le tagata ua aoai ma le poto i taliga ua faalogo mai, o le mama auro lea, ma le asoa auro lelei.” Afai e avatu e se faufautua ni apoapoaiga e faavae i le Afioga a le Atua nai lo ona manatu, ua ia avatu moni se meaalofa tautele. Aisea? Talu ai o nei apoapoaiga e mai ia Ieova lava ia. Ua taʻua mai e le Tusi Paia ia i tatou: “Loʻu atalii e, aua le faatauvaa ia te oe le aoaiga a Ieova; aua foi e te ʻinoʻino pe a aoaiina oe e ia. Auā o le ua alofagia e Ieova, e aoaiina o ia e ia; e pei o le tamā ona aoaiina o lona atalii ua ia fiafia i ai.” (Faataoto 3:11, 12) Afai e talia ma faatatau ma le lotomaulalo e le tagata o loo aoaia ia apoapoaiga, ua pei lava la o loo ia teuteu ia te ia lava i se tautaliga auro. E pei o le faataoto faagaeeina o le Tusi Paia lea e faapea mai: “Amuia le tagata na te maua le poto, ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lea i le auro.”—Faataoto 3:13, 14.