O le Amio Lelei e Viia Ai

O LE nusipepa Italia o le La Gazzetta del Mezzogiorno, na avatu ai se faamālō i Molimau a Ieova mo le lomiaina o le mataupu, “Matera—City of Unique Cave Dwellings” (Matera—Se Aai Tulaga Ese e Mau i Ana). O lenei mataupu na lomia i le lomiga o le Awake! o Iulai 8, 1997, lea na matuā faasalalauina atu i le tele o gagana. I le taimi nei, ua faaliliuina ai le mekasini o le Ala Mai! i gagana e 81 ma e sili atu i le 19 miliona kopi ua faasalalau i le lalolagi aoao. Ua faamatala mai e le nusipepa e faapea, ua faatū e le Ala Mai! se matātia i lenei taumafanafana i le “faasalalauina faalauaitele o le talafaasolopito ma le tomai uigaese i le fausiaina o le aai [o Matera].”

Na faamālō atu le nusipepa i Molimau e tusa ai ma le Tauaofiaga Itumalo o le “Faatuatua i le Afioga a le Atua” lea na faia i Matera i le 1997. Na matauina ai i le mataupu e faapea, na mafai e Molimau ona “faapotopoto atu le 4,000 tagata i le malae taalo XXI o Settembre Stadium, i le ogatotonu o le taumafanafana ma le matuā mutinitini o le la; sa latou faamamāina, toe vali, ma toe faaleleia lenei nofoaga mo taaloga (ae maise lava faleese) e matuā aunoa ma se totogi, na mafai ona latou faatauina mai e i latou lava isi mea manaomia.”

E taumafai Molimau a Ieova e avea i latou o ni tuaoi lelei. (Mataio 22:37-39) E latou te mulimuli foi i le apoapoaiga a le Tusi Paia e faapea: “Ia lelei a outou amio i luma o nuu ese, . . . latou te vaavaai ai i a outou amio lelei, ona latou vivii atu ai lea i le Atua i le aso e asiasi mai ai.”—1 Peteru 2:12.