Lipoti a Ē Faalauiloa le Malo

Faaaogā Avanoa Uma

UA LAUILOA Molimau a Ieova i la latou galuega tau aʻoaʻoga faale-Tusi Paia i le lalolagi aoao. Ae ua latou faia foi polokalame ia e aumai ai isi aogā i tagata lautele. O lenei auaunaga i le lautele ua taliaina lelei, e pei ona faaalia e mea na tutupu i Ecuador ia o loo mulimuli mai.

◻ Sa manao le pulega o se falefaigaluega telē e gaosia ai le tioata e fuafua se mataupu e faatatau i le tāua o aiga mo a latou tagata faigaluega. Sa valaauliaina e le faatonu o alamanuia ni faifeau Katoliko e auai ae sa leai se tali mai. Sa taʻu atu e se tasi o faifeau ia te ia e faapea e toaitiiti ni faifeau e agavaa mo le talanoaina o le mataupu, o lea la e aliali mai e ono leai se tasi e avanoa. I le faalogo atu i lenei mea, sa faia loa e se Molimau e faigaluega ai se fuafuaga ma se uso e masani ona galue i oganuu o pisinisi e asiasi atu i le falefaigaluega.

I le aso lava na sosoo ai, sa faafesootaia ai loa e le Molimau le faatonu o alamanuia o tagata ma se talosaga mo se mataupu tau aʻoaʻoga e faia. Sa faia se lisi o mataupu na aumaia mai i lomiga eseese a le Sosaiete o le Olo Matamata. Sa faagaeetia lava le faatonu. Sa ia filifilia ni mataupu se tolu mo le talanoaga—faiā faaletagata, amioga tatau i galuega, ma amioga tatau i le aiga. Sa faia loa fuafuaga mo le tauaaoina o le mataupu i le aufaigaluega atoa.

Sa vaevaeina le aufaigaluega i vaega e taitoatolusefulu i le vaega, lea sa tauaaoina atu ai e uso agavaa e toatolu mataupu ia i latou. O ā iuga na maua ai? E toatele tagata faigaluega sa mananao e asiasi atu ia i latou i o latou aiga, ma e 216 lomiga faale-Tusi Paia na tuuina. Na matuā faagaeetia pule o le falefaigaluega ma talosaga atu i Molimau pe e mafai ona latou sauniunia se isi faasologa o lauga.

◻ Talu ai nei, sa pasia ai i Ecuador se tulafono lea ua faatagaina ai mataupu faalotu e aʻoaʻoina i aʻoga. Sa asiasi atu se tuafafine misionare i se tamaitai pule o le aʻoga tulagalua ma fesili atu po o faapefea mai le tulafono fou. Sa faamatala e le tamaitai pule faapea, sa faia taumafaiga e amataina ai se polokalame i le tapuaiga ia Maria ae sa lei faataunuuina lea fuafuaga. Ina ua faamatalaina e le tuafafine faapea o sea tapuaiga e mafai ona aumaia ai faafitauli mo tamaiti e lē o ni Katoliko, sa ioe i ai le tamaitai pule. “I le isi itu,” sa faapea atu ai le misionare, “e iai la matou polokalame mo le aʻoaʻoina o mataupu silisili tau i amioga mamā mai le Tusi Paia lea e lē faamalosia ai se tagata e taliaina se tapuaiga patino.” Sa tali atu le tamaitai pule e faapea: “O afea la e mafai ona e sau ai? Tala atu taeao?” Ina ua uma ona faaali atu ia te ia e le misionare le tusi Listening to the Great Teacher, sa filifili ai loa o le a amata talanoaina le mataupu “Happy Are the Peaceable” (E Fiafia i Latou e Faatupuina le Filemu).

Ina ua toe foi ane le tuafafine misionare, sa ia faaaluina le tolu itula e asiasi atu ai i potu aʻoga taitasi e fitu faatasi ai ma le tamaitai pule e faalogologo ai. Ina ua uma le mataupu ma le vasega lima, sa faapea mai se tasi o tamaitiiti aʻoga: “Tamaitai, faamolemole ia faamautinoa e te asiasi atu i le vasega ono. E latou te taumafai lava e fasi i matou ma amata se fusuaga!” Na faaalia e se tasi o faiaʻoga e faapea: “O le sauā o se mataupu e tāua tele. E manaomia se taimi tele e talanoaina ai lenei mataupu.”

Sa faia fuafuaga mo le faia o toe asiga i le aʻoga e talanoaina ai mataupu e pei o le usiusitai ma le pepelo. E oo mai i le taimi nei, ua lelei tele iuga ua maua mai ai. O le taimi la lenei pe a savali atu le tuafafine misionare i le alatele, e taufetuli ane tamaiti e faafeiloai ia te ia ma fesili atu ia te ia fesili faale-Tusi Paia. O nisi tamaiti e latou faafeiloai atu ma le nenee o ia i o latou mātua. E lē gata i lea, ua amataina ai se suesuega faale-Tusi Paia ma tamaiti aʻoga e toalua.