Pe Mafai Ona E Iloa le Saʻo Mai le Sese?

“Sa ou nofosala i le fasiotia o tagata e tusa ma le toʻa 25. . . . E i loʻu mafaufau lava i po uma, ma aso uma le ata o le mea na tupu. E oo ia te au ni miti taufaafefe. . . . So o se mea lava ou te alu i ai, ou te vaai ai i se tagata e faamanatu mai ai ia te au tagata ia na ou fasiotia. O loo mafai lava ona olaola i loʻu mafaufau, e pei lava o loo tupu i le asō, i le taimi lava lenei. . . . E lē mafai ona ou faamagaloina aʻu lava e tusa ai i mea na ou faia.”—V.S.

“Sa faatonuina aʻu ou te alu atu i ai ma faaumatia le fili. . . . Ou te lei mafaufau muamua po o fili nei o aofia ai ni tamaloloa, fafine ma ni tamaiti. . . . O loʻu faalogona i le taimi lena ma mulimuli ane ai o lea sa ou faia le mea na faatonuina ai aʻu, ma sa ou faataunuuina lava faatonuga na tuuina mai ia te au ma ou te lē o lagonaina se sese o le faia faapea.”—W.C.

IA Mati 16, 1968, na auai ai tamaloloa e toalua ua taʻua i luga i le mea na taʻua mulimuli ane o se solitulafono sili ona matuia i le vaitaimi o le taua. O i laua faatasi ai ma isi fitafita, na osofai atu i se tamai nuu lava o Vietiname ma faatamaia ola o le faitau selau o tagata na iai—e aofia ai fafine, o tamaiti, ma tamā matutua. Ae seʻi mātau le eseese o uiga faaalia o nei fitafita e toalua. O le fitafita muamua o loo manino lava le mafatia i le mea na ia faia. O le lona lua o loo ia lagona o ana gaoioiga sa talafeagai. E mafai faapefea i ia tagata e toalua ona tali eseese atu i le mea e tasi na tupu?

O le tali ona o le loto fuatiaifo—le tomai o i totonu o le tagata mai le Atua e fesoasoani ia i tatou e matuā tilofaia lelei ai i tatou lava ma faamasinoina a tatou gaoioiga ma manatunatuga. O le loto fuatiaifo o lo tatou uiga lea i totonu e iloa ai le saʻo ma le sese.

Pe a faia filifiliga, o nisi tagata e mafuli atu i le faaupuga lea, “Fai le mea e fai mai ai lou loto fuatiaifo.” Ae faanoanoa lava, e lē o taimi uma e faatuatuaina ai le loto fuatiaifo. O le mea moni, e toatele ua lolo atu ma oo ina faia ni gaoioiga sauā matautia, ae lē o faapopoleina lava i latou e o latou loto fuatiaifo. (Ioane 16:2; Galuega 8:1) E pei ona sa matauina ai i se tasi taimi e le tusitala Peretania o Samuel Butler e faapea, o le loto fuatiaifo “e lē umi lava ae lē toe fia tali ane ia i latou o ē e lē o fia faalogo atu i ai.”

Pe mafai ona e faatuatuaina lou loto fuatiaifo? O le tali e faalagolago tele lava i le lelei ona toleniina pe aʻoaʻoina, e pei ona o le a faaalia mai e le mataupu o sosoo mai.

[Ē Ana le Ata i le itulau 3]

Vaaiga o le taua i le pito i luga: U.S. Signal Corps photo