Le Taua na Faatamaiaina le Senituri Lona 19

1914

I LE toe mafaufau atu i le meleniuma fou, na tusi mai ai Charley Reese, o se tusitala i le nusipepa The Orlando Sentinel faapea: “O le taua i le 1914-1918 lea na faatamaia ai le senituri lona 19 e lei faamutaina.” O le ā na uiga i ai lana tala? Na ia faamatala: “E lē taitai amanaia e le talafaasolopito aso faalekalena. O lona 19 o senituri—na faamanino mai o se vaega o talitonuga, manatunatuga, o uiga ma tulaga tauamio—sa lei iu ia Ianuari 1, 1901. Na faamutaina i le 1914. O le taimi foi lena na amataina ai le senituri lona 20, lea o loo faapena foi lona faamatalaina. . . .

“O feteenaiga uma ia o tatou popole i ai i o tatou olaga atoa e foliga mai na māfua ona o lena taua. Toetoe lava o mafaufauga ma mea ua tutupu ia ua tatou ola aʻe ai e māfua ona o lena taua. . . .

“Ou te manatu ua tele le faaleagaina e le Taua Muamua a le Lalolagi ona ua faaleaogaina talitonuga o tagata faapea e mafai lava e le fanau a tagata ona pulea lo latou taunuuga. . . . Na faapogaia ai e le taua tagata ina ia latou lafoaia lena talitonuga. Sa lei manatu itu uma e lua o loo tau faapea o le a iu i lea tulaga e pei ona iu nei i ai. Na faatamaia ai le emepaea o Peretania ma Falani. Na fasiotia uma ai tane e sili ona lelei o se tupulaga i Peretania, Falani, ma Siamani. . . . I se taimi puupuu lava, na fasiotia ai le aofaiga e 11 miliona o tagata.”

I le silia ma le 120 tausaga, ua faasino atu ai e Molimau a Ieova i le 1914 e faapea o le iʻuga lea o le mea na fetalai ai Iesu e faapea o le “faaiuina tausaga o nuu ese.” (Luka 21:24) I le tausaga lena, na avea ai Iesu Keriso o lē ua toe faatuina ma faamamaluina, ma Tupu i le Malo faalelagi. E ala mai i lena Malo, o le a aveesea atoatoa ai e Ieova puapuaga ia ua iloa ai lenei senituri.—Salamo 37:10, 11; Failauga 8:9; Faaaliga 21:3, 4.

[Ē Ana le Ata i le itulau 32]

U.S. National Archives photo