Pou Faailoilo o i le Ala i le Ola

AFAI sa e malaga i se auala pe ui atu i se ala e te lē masani ai, pe sa e vaai ea i pou faailoilo o ni mea o loo fai ma faalavelave? Ailoga! E mautinoa lava o le a e vaai i ai o se fesoasoani ia te oe ina ia aua neʻi e sese ese mai le ala e tau i le mea o loo e malaga i ai.

Ae faapefea la, le faimalaga i le auala i le ola? Pe e taulau manuia ea e aunoa ma pou faailoilo? Na taʻutino mai e se perofeta anamua a le Atua le gata mai o le tomai o le tagata i lenei mea. Na ia faapea mai: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.”—Ieremia 10:23.

O fea la, e maua ai le faasinoga o loo manaomia? O le puna maufaatuatuaina mo ia taiala o Lē na Foafoaina le tagata, ma o pou faailoilo faafaatusa e maua i le Tusi Paia. E ala mai i lana Afioga, ua fetalai mai Ieova: “E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.”—Isaia 30:21.

Ioe, ua aumaia e le Afioga a le Atua taiala maufaatuatuaina i vala eseese o o tatou olaga. (Isaia 48:17; 2 Timoteo 3:16, 17) Peitai, o le mea e faanoanoa ai, ona o le toatele o tagata o loo malaga i le ala i le ola i mea ua loto atu i latou i ai e aunoa ma se taitaiga tauatua. (Mataio 7:13) Ae ui i lea, ua mausali le faatutuina o pou faailoilo ma e avanoa i so o se tasi! Po o le a e uaʻi atu ea i ai a o e savali i le ala i le ola?