O le ā le Ituaiga Igoa o E Faia mo Oe?

I LE Tusi Paia, o le upu “igoa” i nisi o taimi e faasino atu i se talaaga o se tasi. Mo se faataitaiga, na tusi le tupu atamai o Solomona e faapea: “E sili ona lelei o le taʻuleleia [“igoa,” NW] i le suāuu lelei; ma le aso e oti ai e sili i le aso e fanau mai ai.” (Failauga 7:1; faatusatusa i le Faataoto 22:1.) E tusa ai ma upu a Solomona, e lē fanau mai se tagata ma se igoa lelei. Na i lo o lena, o le faagasologa o lona olaga o le a maua ai e ia se talaaga faatasi ai ma se uiga moni. O lona igoa e iloa ai o ia i ona uiga totino, pe e matamau pe mataū, pe alofa pe e lē alofa, loto maulalo pe faamaualuga, pe e amiotonu foi pe amioleaga.

Seʻi manatu ia Tavita. A o faagasolo lana nofoaiga tautupu, na ia faaalia mai ai o ia o sē e malosi ma maumauai. I le taimi foi lava e tasi, sa faaalia le loto maualalo o Tavita i lona faailoa o ana mea sese ma salamō i ana agasala. Faatasi ai ma mafuaaga tatau, sa faaalia mai ai e le perofeta a Ieova e faapea, o Tavita o “se tagata mona e tatau ma le finagalo [o le Atua].” (1 Samuelu 13:14) Sa iai se igoa lelei o le talavou o Tavita ma le Atua.

I sona eseesega, o le tupu o Iuta o Ioramo na ia faia se igoa leaga mo ia lava. Na ia faaliliu ese ona tagatanuu mai le tapuaiga ia Ieova ma e oo foi lava i ona uso e toaono ma isi atalii o le tupu o Iuta na ia faaoo ia i latou le oti. Mulimuli ane, na faapogaia e Ieova se maʻi leaga ma le tiga ia Ioramo lea na oo atu ai i lona maliu. Ua faapea mai le Tusi Paia “ua alu [Ioramo] e leai se tausaafi ia te ia,” po o le pei ona taʻua e le Today’s English Version, “e leai lava ma se isi na faanoanoa ina ua oti o ia.”—2 Nofoaiga a Tupu 21:20.

O talaaga o olaga o Tavita ma Ioramo e faataitaia mai ai le saʻo aʻiaʻi o le faataoto a le Tusi Paia e faapea: “O le faamanatuina o lē amiotonu, e viia lava lea; a o igoa o e amio leaga, e pala ia.” (Faataoto 10:7) E ao la ia i tatou taitoatasi ona iloiloina le fesili, ‘O le ā le ituaiga o igoa o oʻu faia ma le Atua ma oʻu uso a tagata?’