Se Motu e Tu Mamao Ese ma Laitiiti
O UPU faamatala e masani tele ona faaaogā e faamatala ai le motu o St. Helena o le “tu mamao ese” ma le “laitiiti.” E fetaui lea ona o lenei motu, e sefulu ma le ʻafa maila [17 kilomita]) le umī, ono ma le ʻafa maila [10 kilomita] le lautele, ae 1,200 maila [1,950 kilomita] e va ai ma le laueleele e pito sili ona latalata ane i ai, le talafatai i saute i sisifo o Aferika. O iinei lea na auina i ai Napoleone Ponapate i le 1815 o sē sa faaaunuua, e ola ai seia oo i lona maliu.
Pe a vaai mai le vasa agaʻi i le motu, e foliga mai o se ʻolo e taufaafefe. Ae o le mea moni o se mauga mu ua lē o toe ola na mānu aʻe mai le vasa Atalani ma avea ai ma mato e tafatō e oo le maualuluga i le 1,600 i le 2,300 futu [500 i le 700 mita]. I lona ogatotonu e tu ai le mauga o Actaeon e 2,685 futu [818 mita], lea e sili ona maualuga i le motu atoa. Ona o le mālū o le matagi e agi mai le Atalani i Saute ma tafega o le sami, ua māfua ai ona tele ina lagi lelei ma manaia le tau o le motu. Peitai, e faasolo mai i vaega mafola o le talafatai e oo atu i vaega maugā i fanuāuta o le motu, e matuā anoanoai ituaiga eseese o tau e maua i ai, ma faatoaga o loo ola ai.
Ua leva ona pulea e Peretania le motu o St. Helena talu mai le faaiuga o le senituri lona 17. E pe ā ma le 5,000 le faitau aofai itiiti o se tuufaatasiga o tagata mai Europa, Asia ma Aferika. E faaaogaina le gagana Peretania i le motu atoa ae e matuā ese lava le auala e faaleoina atu ai. E leai se malae vaalele iina; na o le pau lava le auala e femalagaai atu ai i isi atunuu o le vaa, i malaga masani i Aferika i Saute ma Egelani. O le mea moni, faatoʻā maua auala o faasalalauga i televise i le taulotoaiga o vaitausaga mai le 1990, i le fesoasoani mai o fesootaiga a satelite.
I uluai tausaga mai le 1930, na uluai oo atu ai le tala lelei o le Malo o le Atua i nei laufanua. (Mataio 24:14) I le faagasologa o tausaga, e toatele tagata o le motu na mauaina lenei oa ma avea ai oa faaletino ma mea e faatauvaa. (Mataio 6:19, 20) I aso nei, ua olioli ai St. Helena i se faatatauga e sili i le lalolagi o le toʻa 1 o se Molimau i le toʻa 31 tagata.
[Faafanua i le itulau 24]
(Tagaʻi i le lomiga mo le ata atoa)
St. Helena
JAMESTOWN
Levelwood
AFERIKA
VASA ATALANI
St. Helena