“Na Mafai Ona Ou Lagonaina se Siomaga Filemu”

NA ALU atu se taulealea e tautala i le gagana Siamani i se tauaofiaga sa faamaopoopoina e Molimau a Ieova ina ia “lamalama” i Molimau. Aisea? O lona sini ina ia “faataapeina lenei faapotopotoga faalelotu ma taofia ai ana uo mai le faaseseina.” Ina ua maeʻa ona auai atu i le tauaofiaga, ona ia tusia lea o le tusi lenei i ana uo:

“Ina ua ou oo atu i le nofoaga o le tauaofiaga, sa ou tomānatu pe o le nofoaga saʻo lea. E leai ma se tasi na tūtū i fafo o le faletaalo, ma e leai foi ni otaota po o ni apa pia na taatitia i le fola. A o oʻu faalatalata atu, na ou vaaia ai ni tamaloloa se toalua i le faitotoa o le faletaalo. Na la faafeiloai mai ma faatagaina aʻu i totonu.

“Sa ou faatalitalia le pisapisao mai le faitauafe sa tatau ona iai iina, ae peitai sa matuā filemu lava. ‘O lea,’ sa ou manatu ai, ‘atonu na o ni nai tagata lava la o loo taapeape solo i lenei nofoaga.’

“Ina ua ou ulufale atu, na vave lava ona faaosofia loʻu uaʻi atu i se tala sa faatinoina mai i luga o le pulelaa. Mulimuli ane na faatoʻā ou iloa ai sa matuā faatumulia le faletaalo i le faitauafe o tagata o loo faalogologo ma le totoʻa. Na mafai ona ou lagonaina se siomaga filemu. O mea na ou faalogo ai, vaaia, ma lagona i le taimi na totoe o le tauaofiaga na tuua ai se aafiaga loloto ia te au.

“O le miomiō faatasi ma Molimau, na matuā ou matauina ai o latou laufofoga fiafia ma faaupuga agalelei. Na faafuasei lava, ona ou lē mafai ona taofia le manatu e faapea, ‘O tagata moni nei o le Atua!’”

Na i lo le ‘taofia la o ana uo mai le faaseseina,’ na talosaga atu lenei taulealea ina ia latou suesue faatasi le Tusi Paia ma ia. O le iuga? I le taimi nei, o loo avea o ia ma se toeaina Kerisiano. O loo maelega o ia ma lona aiga i se tasi o faapotopotoga i Zug, i Suisilani.