Taiala i le Filifilia o Aumea Lelei

UA MATAUINA e se lipoti mai le Reader’s Digest e faapea ua vaavaai atu talavou i a latou aumea na i lo o latou mātua mo taiala i laei ma musika. O lea e tāua ai mo mātua ona iloaina po o ai o loo auaumea ma a latou fanau ae o fea foi o iai.

Ua faapea mai Esmé van Rensburg, o se failauga sinia i le matagaluega o suesuega tau le mafaufau i se iunivesite i Aferika i Saute: “O lau matafaioi le suesueina.” Ua ia toe faaopoopo mai e faapea: “E iai taimi o le a lē fiafia ai lau tama ia te oe, peitai e iu lava ina toe teʻa mālie atu.” O lea na ia tuuina atu ai ni fautuaga o loo mulimuli mai i mātua. E tatau ona fetaui tulafono ma ia iai ni mataupu silisili faavae mautinoa; faalogologo atu i lau tama; aua le soona mateletele, ae ia toʻa lelei, ma ia e iloa le mea o loo e manao e taʻu atu. Pe afai ua uma ona fafau aʻe e lau tama se faauoga ma se aumea e lē tatau ai, ia faaautū lau talanoa i amioga lē tatau o loo mapuna aʻe ona o le faauoga na i lo le na ona faasāina o le toe aumea atu i ai.

O fautuaga talafeagai mo mātua ua loa ona iai i le Afioga a le Atua, le Tusi Paia. Mo se faaaoaoga, ua taʻua ai e faapea: “Ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.” (Iakopo 1:19) Ua aumai foi e le Tusi Paia lenei fautuaga alofa i le filifilia o aumea: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.” (Faataoto 13:20) O nei faaaoaoga ua faataitai mai ai le poto o loo faaavanoaina mai mo i latou o ē faitauina le Tusi Paia ma le talisapaia ma faatatauina mea o taʻua ai i le olaga i aso taitasi.