Faiga Faailogalanu ma Lotu

“INA ua ou malaga mai i le Iunaite Setete i le 1978, na ou talitonu ua leva ona foia e Amerika ona faafitauli tau faailogalanu, ma avea ai tagata uli ma tagatānuu e tutusa uma aiā tatau,” ua faapea mai ai Mark Mathabane, o se tusitala na fanau i Aferika i Saute, i se faatalanoaga ma le mekasini o le Time. “E tele itu na ou iloa ua faaleleia. Na foliga mai le Iunaite Setete ua matuā sili atu ona faaleleia lo latou tulaga na i lo Aferika i Saute. Mulimuli ane, na ou iloaina ma loʻu teʻi tele e faapea e lē o telē lava se suiga i loto o tagata.” O le ā na māfua ai ona oo ia te ia lena manatu e faateʻia ai?

Na faapea mai Mathabane: “O se tasi o taimi e pito sili ona tuueseesea ai tagata i Amerika o le 11 i le taeao o le Aso Sa.” Na ia matauina e faapea e oo lava i totonu o lotu, e lē mafai e tagata ona latou auai faatasi i se tapuaiga ma se isi ituaiga o lanu. Na fesili o ia: “O ā la o latou faalogona e iai i isi aso o le vaiaso?” O le faatalosagaina o aʻoaʻoga e avea ma vaifofo vave mo se suiga, na faapea mai ai Mathabane: “O aʻoaʻoga o le a e iloa ai le tutusa uma o tagata soifua.”

E ioe Molimau a Ieova faapea o aʻoaʻoga o le tali lea, ae e latou te fautuaina faapitoa aʻoaʻoga e faavae mai le Afioga a le Atua. Ioe, ua fesoasoani le Tusi Paia ia te i latou ina ia soloia ai pa o faiga faailogalanu—e oo lava i atunuu e taatele ai feainaiga i ituaiga e tupuga mai ai. I vaiaso taitasi i o latou Maota o le Malo, e faapotopoto faatasi ai ituaiga o lanu ma atunuu eseese ina ia aʻoaʻoina tulafono ma mataupu silisili o le Afioga a le Atua, le Tusi Paia. E lē aoina ni peleti i nei sauniga. E matuā taliaina lelei lou auai mai!