Na “Matatau i le Atua” i Laʻua
A O NOFO pologa tagata Isaraelu i Aikupito, na fesagaʻi ai fafine faatosaga Eperu o Sepela ma Puʻa ma se tulaga e faapopoleina ai. I se taumafaiga ina ia faaitiitia le faatuputupulaʻia o le faitau aofaʻi o tagata ese, na faatonuina ai e Farao nei fafine: “Pe a oulua faatosaga i fanauga o fafine Eperu, . . . afai o se tama ia fasioti ia te ia.”—Esoto 1:15, 16.
Na “matatau i le Atua” Sepela ma Puʻa, o lea na loto tetele ai i laʻua ma sa la “lei faia foi le mea na fai atu ai le tupu o Aikupito ia te i laua.” Na i lo lea, sa la faaolaina pepe tama, e ui o lenei gaoioiga lototele na ono tuuina atu ai i laʻua i se tulaga lamatia. “Ua agalelei [Ieova] i e na faatosaga i fanauga,” ma na ia tauia ai i laʻua mo a la gaoioiga faasaoola.—Esoto 1:17-21.
Ua faamamafaina e lenei tala le talisapaia e Ieova o i latou o ē auauna ia te ia. Sa ono mafai ona ia silasila i le mea sa faia e Sepela ma Puʻa, e faapea o se uiga o le faaalia o le lototele, ua na o se gaoioiga alofa faaletagata. Ae maise ai, e leai se fafine o loo tonu lona mafaufau o le a na fasiotia ni pepe! Peitaʻi, e lē masalomia na silafia e Ieova le mea moni e faapea o nisi tagata, ona o le fefefe i isi tagata, ua latou faia ai ni gaoioiga matagā ma le matuā ʻinosia. Na ia silafia e faapea o nei fafine faatosaga na uunaʻia e lē gata o le alofa faaletagata ae faapea foi se mataʻu ma se tuutōina atu i le Atua.
Maʻeu se loto faafetai e mafai ona ia i tatou i lo tatou auauna atu i se Atua e amanaʻia maia a tatou galuega faamaoni! E moni, atonu e leai se tasi o i tatou ua fesagaʻia le tofotofoga o le faatuatua lea na faaoo atu ia Sepela ma Puʻa. Peitaʻi, pe a tatou tutū mausalī mo le mea ua tonu—tusa lava pe i le aʻoga, po o nofoaga i galuega, po o so o se tulaga lava—e lē faagaloina e Ieova lo tatou alofa faamaoni. Na i lo lea, “na te tauia mai o e matuā saili ia te ia.” (Eperu 11:6) Ioe, “e le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa, auā na outou auauna i le au paia, i le o loo outou auauna i ai.”—Eperu 6:10, LF.