Lipoti a Ē Faalauiloa le Malo

Faatelega Faatiokarate i Namibia

NA MUAʻI taunuu le tala lelei o le Malo o le Atua i Namibia i tausaga faaiʻuiʻu o le 1920. Talu mai lena taimi, e faitau selau tagata loto faamaoni ua tali lelei atu i le feʻau o le faaolataga a le Atua. O tala nei o mea na tutupu ai, ua faaalia ai le auala o loo aoaoina ai e Ieova tagata manaʻomia i totonu o lana lafu.—Hakai 2:7.

◻ O Paulus, o se faifaatoʻaga e lē tele ni ana meafaitino, ma o loo nofo i le itu i mātū i sasaʻe o Namibia, na muaʻi feiloaʻi ma ni Molimau a Ieova ina o asiasi atu o ia i Windhoek, le aai laumua. Na vave lava ona talitonu Paulus e faapea ua ia maua le upu moni. Na toe foʻi atu o ia i lona aiga ma le tusi, E Mafai ona E Ola e Faavavau i Parataiso i Le Lalolagi. Ona ia toe malaga atu lea i Rundu, o se aai e pito latalata ane sa iai se Maota o le Malo, na maua ai e Paulus ia Molimau ma faatauanau i latou ina ia asiasi atu ia te ia.

Ae peitaʻi, e matuā mamao tele mo Molimau le ō atu e faia se suʻesuʻega faale-Tusi Paia faalevaiaso ma Paulus. Ma le lē faavaivai, na amata ai e Paulus ona suʻesuʻe e ia lava le Tusi Paia. E lē gata i lena, sa ia talaʻi atu ma le maelegā i isi mea ia sa ia aʻoaʻoina. Ina ua mavae se taimi, na faavae ai iinā se suʻesuʻega faale-Tusi Paia a vaega. Ina ua faalogo lenei vaega toʻalaiti o faasalalau mai i le leitiō e faapea o le a faia se fonotaga a Molimau a Ieova i Rundu, sa latou saosao faatasi a latou tupe itiiti na maua ma fuafua ai mo se auala e faimalaga ai i le fonotaga.

Maʻeu le fiafia na oo ia i latou ona o le uluaʻi taimi lea ua aufaatasi atu ai ma Molimau a Ieova! Sa vave lava ona faia ni fuafuaga mo ni uso agavaa e asiasi atu e lē aunoa i lea vaega. I aso nei, e toʻaono le ʻau talaʻi ua iai i le nuu lea e nofo ai Paulus.

◻ Sa faatupuina le naunau fiafia o Johanna i le suafa o le Atua ina ua ia faalogo i se tasi o tautala i ni upu taufaaleaga i Molimau a Ieova. Na faapea mai o ia: “O le taimi muamua lava na ou faalogo ai i le suafa o Ieova, na pipiimau ai i loʻu mafaufau, ma na amata ai ona ou tau manatunatu po o ai Ieova. Sa ma nonofo ma loʻu toʻalua e latalata i Walvis Bay i le talafatai o Namibia. I se tasi taimi na ma ō ai i le taulaga, na ou vaaia ai ni Molimau o tufatufa atu le mekasini o Le Olomatamata i le auala. Na ou maua se kopi ma talosaga atu mo le faia o se suʻesuʻega faale-Tusi Paia, talu ai sa tele ni aʻu fesili. Sa ou tagi ina ua latou faailoa mai ia te aʻu e faapea, e lē mafai ona latou ō mai ona ua leaga la latou taavale. E leʻi pine mulimuli ane, ae maliu loʻu toʻalua, ma sa ou alu atu loa ma nofo i le aai o Keetmanshoop. Sa tofia se paeonia faapito (se faievagelia faataimi atoa) e galue ai iinā, ma na ou maua ai le tusi O Le Upu Moni E Taʻitaʻi Ai I Le Ola Faavavau mai ia te ia. Mai lava i le amataga, na ou lagona ai e faapea, o le upu moni lava lenei.

“I se taimi mulimuli ane, na valaaulia ai aʻu e faia soʻu sao i le galuega talaʻi, ae o le fefe i tagata na lofitūina ai aʻu. A o savali atu mai lea fale i lea fale, sa ou tatalo atu ia Ieova e faapea, e lelei pe ana ou oti na i lo o le tuu atu o aʻu ou te alu e talaʻi. I le taimi muamua na ou auai i le molimau atu i le ala tele i le aai, na ou lafi ai i se auala vāiti ma le faamoemoe ia lē iloa mai aʻu e se tasi. I le iʻuga, na ou maua le loto tele e faalālā atu ai se mekasini i se tagata na ui ane, ma o le taimi lava lena na mafai ai ona ou fai atu se upu. I lena aso, ona o le fesoasoani mai ia Ieova, na mafai ai ona ou talanoa atu i le toʻatele o tagata e uiga i loʻu faamoemoe e faavae i le Tusi Paia.

“Ina ua mavae le 12 tausaga, e ui lava o loo mativa i mea faaletino, ae i aso nei, o loo ou faapelepele pea i le faaeaga o le auaunaga faapaeonia ma faaauau ona maua ai le olioli e lē mafaatusalia ona o le tufaina atu o le upu moni o le Malo i isi.”