Le Mea ua ia Misia i le Aai o Niu Ioka

O LE faailoga o loo e vaʻaia iinei ua loa ona faaalia i se tasi o falegaosimea a le Sosaiete o le Olomatamata i Brooklyn, Niu Ioka, i le faasologa o tausaga talu mai le 1950. Ua faamanatu atu i ē femalagaaʻi, o turisi, ma isi e ui ane ai ina ia faitau le Tusi Paia i aso taʻitasi. O le tusi o loo mulimuli mai, na maua mai se teineitiiti Molimau, e faaalia ai aafiaga mālolosi o lenei faamanatu.

“Sa ma talanoaina ma saʻu uō i le vasega le mea sa oʻu manaʻo e fai pe a ou tuʻua le aʻoga maualuga. Na amata ona ou talanoa e faatatau i Peteli, le ofisa ulu o Molimau a Ieova ma na matuā faagaeetia lava o ia. Na ia fai mai ia te aʻu faapea sa nofo o ia i lona olaga atoa i le Aai o Niu Ioka. E lē toaaga lo latou ʻāiga i le lotu, ae i taeao uma lava e tilotilo ai i fafo mai le faamalama, na te iloa atu ai le faailoga o loo faapea ‘Faitau le Afioga a le Atua le Tusi Paia i Aso Taʻitasi.’ O lea na te faitauina ai le Tusi Paia i aso uma lava a o leʻi alu atu i le aʻoga.

“Ina ua ō ese mai le aai, na ia faapea mai ai o le mea o loo ia misia mai le Aai o Niu Ioka o le taimi lea e ala aʻe ai, ua ia lē o toe vaʻai i le faamanatu ina ia faitau le Tusi Paia. Ae ona o le faailoga o le fale o le Olomatamata, ua avea ai le faitauina o le Tusi Paia ma masani, o lea ua faaauau ai lava ona ia faitauina le Tusi Paia i aso taʻitasi!”

Maʻeu se auala lelei e mafai ona amata ai le aso i le faitauina lea o se vaega o le Afioga a le Atua! O le faia faapea, e te mautinoa lou iloa lelei ai o upu a le aposetolo o Paulo: “[O] tusi paia . . . e mafaia ona faapoto ai ia te oe e iu ai i le faaolataga i le faatuatua ua ia Keriso Iesu.”—2 Timoteo 3:15-17, LF.