Se Sauniga Faapitoa—Pe o le a E Iai Iinā?

O SE aso e lē mafaagaloina i le silia ma le 3,500 tausaga ua teʻa, sa faatonuina ai e Ieova le Atua ʻāiga taʻitasi o Isaraelu sa faapologaina i Aikupito ina ia fasimate se tamaʻi mamoe po o se ʻoti ma sausau lona toto i pou ma lāʻau faalava o o latou fale. I lena lava po, na sopoloa ai e le agelu a le Atua fale sa faailogaina i lenei auala, ae fasiotia atalii ulumatua i ʻāiga o tagata Aikupito uma. Ona faasaʻolotoina ai lea o tagata Isaraelu. O le faamanatuga faaletausaga o lena mea na tupu, ua faamanatuina ai e tagata Iutaia le Paseka.

I le taimi lava lea ina ua māeʻa ona faamanatuina e Iesu Keriso lana Paseka mulimuli ma ona aposetolo, na ia amataina ai se tausamiga o le a faamanatuina ai lona maliu faataulagaina. Na ia aao atu i ona aposetolo le areto lē faafefeteina ma faapea atu: “Ina tago ia, ina aai; o loʻu tino lenei.” Ona ia tuu atu lea ia i latou se ipu uaina ma faapea atu: “Ina inu ia outou uma i ai; auā o loʻu toto lenei, o le toto o le feagaiga ua faamaligiina mo tagata e toatele e faamagalo aʻi agasala.” Na toe fetalai Iesu: “Tou te faia le mea nei e fai ma faamanatuga ia te au.” (Mataio 26:26-28; Luka 22:19, 20) O lea na poloaʻiina e Iesu ona soo ina ia faia lenei faamanatuga o lona maliu.

O le faamanatuga o le maliu o Iesu i lenei tausaga e paʻū i le Aso Lulu, Aperila 19, pe a goto le la. O le a faapotopoto Molimau a Ieova i le lalolagi aoao i lenei po faapitoa ina ia faamanatu lenei Faamanatuga i le auala na talosagaina e Iesu. E matuā valaʻaulia ma le māfana oe ina ia aufaatasi ma i matou o ni ē faamanatuina. Faamolemole ia faafesootaʻi Molimau a Ieova i lou vaipanoa mo le taimi tonu ma le nofoaga e fai ai le sauniga.