Le Tetee a Mātua i le Faailogatagata o se Faiaʻoga

Na auina atu e le faiaʻoga o le aʻoga tulaga lua o Cassano Murge, i Italia, ni pepa faapipii (sticker) ma nisi o ana tamaiti aʻoga. O nei pepa sa fuafuaina e faapipii i le faitotoʻa pito i luma o o latou fale, sa tusia ai le faasilasilaga e faapea: “O i matou o Katoliko. Ua matou talosagaina Molimau a Ieova ina ia aua neʻi tuʻituʻi mai i lenei faitotoʻa.”

Na matuā tetee mālosi atu nisi o mātua o tamaiti aʻoga e ui e lē o ni Molimau a Ieova, i gaoioiga a le faiaʻoga. E tusa ai ma le faamatalaga a le lōmiga o tala fou e taʻua o le Muoviti Muoviti, na tuuaʻia e mātua faapea ‘o le tuuina atu i tamaiti o nei ituʻāiga o feʻau e fesoasoani atu lea i lo latou teʻena o so o se tasi e lē tutusa lona manatu ma i latou po o le faasāina o se tasi ona e “ese” lana tapuaʻiga.’ O se tasi matua na tusi atu i le lōmiga lenei na ia taʻua le pepa faapipii “o le fatu vao, e tupuga mai ona o le lē iloa ma le faavalevalea.”

E pei ona faamatala mai e lenei lipoti, ua iloa e le toʻatele o tagata e lē faailogatagata ia le mataʻutia o le lūlūina o fatu o le faailogatagata. Latou te faaalia foʻi le faaaloalo mo le faiva faa-Kerisiano o loo faatinoina e Molimau a Ieova i so o se vaipanoa o Italia ma le lalolagi atoa. Aiseā e lē fesili atu ai i Molimau mo ‘se uiga o le faamoemoe o loo ia i latou’? O le a latou naunau e talanoaina ma oe, e faia faapea ma le “ava.”—1 Peteru 3:15.