Aiseā e Faamagalo Ai?
NA LIPOTIA mai e le Toronto Star a Kanata e faapea: “Ua faataatia e saienitisi se suʻesuʻega lea ua amata ona faaalia ai o faamagaloga e mautinoa le mafai ona faaleleia ai tulaga tau faalogona—ma, atonu foʻi e aofia ai le soifua mālōlōina faaletino.” E ui i lea, na mātauina e le polofesa o Carl Thoresen o le Iunivesite o Stanford, a le Iunaite Setete o Amerika, o lē na faauluulu i ai suʻesuʻega a le Standford Forgiveness Project (Le Suʻesuʻega a Standford e Uiga i Faamagaloga) faapea “e toʻaitiiti lava ni tagata o loo malamalama i le mea e taʻu o le faamagalo ma le auala e faagaoioi ai.”
O le faamagaloga moni e vaai i ai o se vala tāua lea o le Faa-Kerisiano. Ua faamatalaina e le lipoti a le Toronto Star lena mea o le “amanaʻiaina ua agaleagaina oe, aveese uma lava lagona tigā, ma mulimuli ane ona tali atu ma le agalelei ma le alofa foʻi i le tagata na faatigā mai.” E tatau ona iai sona faaeseesega mai le manatu māmā, faaʻaloʻalo, faagalogalo, po o le faafitia o se measesē na faia; e lē uiga atu foʻi i le toe tuuina o oe i se tulaga e mafai ona faaleagaina ai oe. Fai mai le lipoti faapea o le ki i le faamagalo moni o le “faateʻa lea o le ita ma ni lagona lē lelei.”
Na faapea mai tagata suʻesuʻe e manaʻomia ni saʻiliʻiliga faaopoopo i aogā faaletino o faamagaloga. Peitaʻi, na latou lipotia mai foʻi ona aogā tau le mafaufau, e aofia ai le “faaitiitia o le mafatia i faalogona, popolega ma le lotovaivai.”
O se mafuaaga autū e ala ai ona faamagalo o loo faamatalaina mai i le Efeso 4:32, lea o loo faapea mai: “Ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.” E tusa ai la o le faamagalo, faapea ma isi o mea, ua timaʻi mai i tatou ina ia faaaʻoaʻo i le Atua.—Efeso 5:1.
O le musu e faamagalo isi pe a iai se faavae e ao ai ona faaalia le alofa mutimutivale e mafai ona matuā aafia ai la tatou faiā totino ma le Atua. Ua faatalitalia e Ieova i tatou ina ia tatou fefaamagaloaʻi. Ona tatou tatalo atu lea ina ia faamagaloina i tatou e ia.—Mataio 6:14; Mareko 11:25; 1 Ioane 4:11.